پیغام رسانی کے لیے استعمال ہونے والی دنیا کی سب سے مقبول ایپلیکیشن واٹس ایپ نے اسٹیٹس شیئرنگ فیچر پر کام شروع کردیا۔
واٹس ایپ کی جانب سے رواں سال متعدد نئے فیچر متعارف کروائے گئے ہیں جس کا مقصد صارفین کو نت نئی سہولیات فراہم کرنا اور دوسری ایپلیکیشن پر سبقت لے جانا شامل ہے۔
ٹیکنالوجی رپورٹس کے مطابق واٹس ایپ صارفین کو ایک نئے فارورڈنگ ٹوگل (بٹن) کے ساتھ اسٹیٹس پوسٹس پر بہتر کنٹرول حاصل کرنے کا اختیار فراہم کرے گا۔
یہ آپشن صارفین کو یہ فیصلہ کرنے کی اجازت دے گا کہ آیا کوئی بھی رابطہ اپنا اسٹیٹس شیئر کرسکتا ہے یا نہیں۔
نیا فیچر سب سے پہلے اینڈرائیڈ بیٹا کے ورژن 2.25.16.16 میں دیکھا گیا تھا، اور امکان ہے کہ آنے والے ہفتوں میں اسے عالمی سطح پر متعارف کرایا جائے گا۔
یہ پڑھیں: واٹس ایپ میں میسجز سے متعلق زبردست فیچر کا اضافہ
یہ خصوصیت اسٹیٹس پرائیویسی سیٹنگز میں آن/آف سوئچ کو شامل کرتی ہے۔ اگر فیچر بند ہے تو، ٹوگل آپ کے رابطوں کو آپ کے اسٹیٹس کو آگے بھیجنے یا دوبارہ شیئر کرنے سے روک دے گا۔
واٹس ایپ پرائیویسی مینو کے تحت اسٹیٹس سیٹنگ کے اندر” الاؤ ری شیئر” سوئچ متعارف کرائے گا جسے آف کیے جانے کے بعد ناظرین کی اسکرینز سے فارورڈ آئیکن ہٹ جائے گا۔
اسٹیٹس فارورڈنگ کی اجازت کے ساتھ فارورڈ کی گئی کاپی میں آپ کی پرائیویسی کی حفاظت کیلئے آپ کا فون نمبر اور پروفائل کی تفصیلات پوشیدہ رہیں گی۔
دوسری جانب اس آپشن کو آن کردینے سے آپ کےکانٹیکٹس میں شامل افراد اسے اپنی چیٹس یا اسٹیٹس فیڈ میں بآسانی شیئر کر سکیں گے۔
واضح رہے کہ اب تک صارفین صرف یہ کنٹرول کر سکتے تھے کہ ان کا اسٹیٹس کون دیکھتا ہے؟ تاہم اب مخصوص اجازت کے ساتھ واٹس ایپ اسٹیٹس کو شیئر کیا جاسکتا ہے۔
