کراچی : شہر قائد میں ایک بار پھر گندم اور آٹے کے بحران خدشہ پیدا ہوگیا، جس کی وجہ سندھ حکومت اور فلور ملز مالکان کے درمیان گندم سے متعلق چپقلش بتائی جارہی ہے۔
تفصیلات کے مطابق گندم کی عدم دستیابی سے متعلق فلور مل مالکان نے ہنگامی اجلاس طلب کیا جس میں گندم کی عدم دستیابی اور شہر بھر کی فلور مل بند ہونے کا خدشہ ظاہر کیا گیا۔
اجلاس کے دوران فلورمل مالکان نے محکمہ خوراک سندھ پر دھوکا دہی کا الزام عائد کرتے ہوئے کہا کہ محکمہ خوراک نے فلور ملوں سے3ارب روپے لے کر بھی گندم فراہم نہیں کی۔
چیئرمین فلور ملز عامر عبداللہ نے اجلاس سے خطاب کرتے ہوئے کہاکہ محکمہ خوراک نے50لاکھ گندم بوریاں دینے وعدہ کیاتھا جبکہ فلورمل کو تاحال صرف 2لاکھ بوریاں ملی ہیں۔
انہوں نے کہا کہ فلور ملوں کو5لاکھ 52ہزار گندم کی بوریوں کے چالان دیئے گئے ہیں، محکمہ خوراک سے گندم کی جلد فراہمی کا مطالبہ کرتے ہیں،مطالبات نہ مانے گئے تو2مئی کو لائحہ عمل کا اعلان کریں گے۔
واضح رہے کہ اس سے قبل رواں ماہ کے وسط میں چیئرمین فلور ملز ایسوسی ایشن چوہدری عامر نے ایک بیان میں بتایا تھا کہ محکمہ خوارک نے فلور ملز کی اندرون سندھ سے خریدی گئی گندم کو ضبط کرلیاہے جس کئے باعث کراچی شہر میں آٹے کے بحران کا خدشہ پیدا ہو گیا ہے۔
انہوں نے کہا کہ 12 ٹرکوں پر لدی 500 ٹن سے زائد گندم ضبط کی گئی ہے یہ کراچی کی 70 سے زائد فلور ملز کو اندرون سندھ سے گندم فراہم کرنی تھی۔
علاوہ ازیں پنجاب کے شہر حافظ آباد میں گندم کے ذخیرہ اندوزوں کےخلاف کریک ڈاؤن کیا گیا ہے،کارروائی کے دوران47300 بوری گندم برآمد کرکے گودام کو سیل کردیا ہے۔
