اسلام آباد: گندم اسکینڈل کی تحقیقات کے لیے نیب میں شکایت درج کرا دی گئی۔
تفصیلات کے مطابق اظہر صدیق ایڈووکیٹ نے گندم اسکینڈل کی تحقیقات کے لیے نیب میں شکایت درج کرا دی جس میں اے آر وائی نیوز کی خبروں کا حوالہ بھی دیا گیا ہے۔
نیب کو دی گئی شکایت میں کہا گیا ہے کہ سابق نگراں وزیر نے اے آر وائی نیوز کو انٹرویو میں گندم اسکینڈل کے راز کھولے، ڈاکٹر کوثر عبداللہ نے بتایا کہ 40 لاکھ میٹرک ٹن گندم تھی پھر بھی درآمد کی گئی۔
نیب شکایت کے مطابق ڈاکٹر کوثر نے بتایا کہ گندم امپورٹ کے وقت کیپٹن (ر) محمد محمود ہی سیکریٹری فوڈ سیکیورٹی تھے، غیر ضروری گندم امپورٹ سے ملک کو 300 ارب کا نقصان ہوا۔
نیب کو دی گئی شکایت میں پاسکو، فوڈ ڈیپارٹمنٹ پنجاب، وزارت کامرس اور خزانہ کو ذمہ دار ٹھہرایا گیا ہے، اور استدعا کی گئی ہے کہ معاملے کی فوری تفتیش کر کے اسکینڈل میں ملوث افراد کے خلاف کارروائی کی جائے۔ اس شکایت کی کاپی صدر آصف زرداری، وزیر اعظم شہباز شریف، رجسٹرار سپریم کورٹ اور لاہور ہائیکورٹ کو بھی بھیجی گئی ہے۔
