واشنگٹن: آخر کار اس تاریخ کا اعلان کر دیا گیا ہے جب امریکا میں مریضوں کو کرونا ویکسین لگائی جائے گی۔
تفصیلات کے مطابق امریکا نے کرونا ویکسین مریضوں کو دینے کی حتمی تاریخ کا اعلان کر دیا، ایف ڈی اے کا کہنا ہے کہ کو وِڈ 19 کے مریضوں کو ویکسین دینے کا آغاز 11 دسمبر سے کیا جائے گا۔
فوڈ اینڈ ڈرگ ایڈمنسٹریشن (ایف ڈی اے) کے سربراہ کا کہناتھا کہ ایک خصوصی اجلاس میں ویکسین کی منظوری کے 24 گھنٹوں کے اندر اسے کرونا مریضوں تک پہنچا دیا جائے گا۔
امریکی میڈیا کے مطابق امریکی دوا ساز ادارے کی درخواست پر ایف ڈی اے کا اجلاس 10 دسمبر کو بلایا گیا ہے، جس میں امریکی کمپنی فائزر کی بنائی گئی کرونا ویکسین کی منظوری پر غور ہوگا۔
روسی ویکسین حاصل کرنے والا یورپی یونین کا پہلا ملک
واضح رہے کہ فارماسیوٹیکل کمپنی فائزر نے جرمنی کمپنی کے اشتراک سے تیار ہونے والی کرونا ویکسین سے متعلق کہا تھا کہ یہ کو وِڈ 19 کے خلاف 95 فی صد مؤثر ہے۔
یاد رہے کہ امریکا میں کرونا ویکسینز کی کامیاب آزمائشیں مکمل ہو چکی ہیں، گزشتہ روز امریکی بائیو ٹیکنالوجی فرم موڈرنا کی جانب سے ویکسین کی قیمت سے متعلق بیان بھی سامنے آیا تھا، کمپنی کے سی ای او اسٹیفن بینسل نے کہا تھا کہ ان کی ویکسین کی قیمت 25 سے 37 ڈالرز کے درمیان ہوگی۔
