قطری حکام نے اس بار ایجوکیشن سٹی اسٹیڈیم میں عید الاضحی کی نماز کا اہتمام کرنے کا فیصلہ کیا ہے، عید الفطر کی نماز بھی اسی اسٹیڈیم میں ادا کی گئی تھی۔
غیر ملکی میڈیا کے مطابق قطر فاؤنڈیشن کی جانب سے اعلان کیا گیا ہے کہ اس بار 28 جون 2023 کو عید الاضحی کی نماز ایجوکیشن سٹی اسٹیڈیم میں ادا کی جائے گی۔ حکام کے مطابق وہ عید کی نماز دوبارہ سے ایجوکیشن سٹی اسٹیڈیم میں ادا کرنے کا اہتمام کریں گے، ماہ اپریل کے اوائل میں اسی مقام پر عید الفطر کی نماز بھی منعقد کی گئی تھی۔
نماز عید کی ادائیگی کے لیے صبح 5 بجے کا وقت مقرر کیا گیا ہے جس کے بعد عید کی تقریبات 9 بجے تک ایجوکیشن سٹی کی مسجد میں جاری رہیں گے۔ قطری فاؤنڈیشن کے حکام کا کہنا ہے کہ وہ بڑی تعداد میں نمازیوں اور حاضرین کو خوش آمدید کہنا چاہتے ہیں اور انھیں پر لطف ماحول فراہم کرنا چاہتے ہیں۔
فیملیز کو تفریح فراہم کرنے کے لیے تقریب میں مختلف سرگرمیاں شامل ہوں گی جس چہرے کی پینٹنگ، گیمز سمیت کھانے پینے کی اشیا فراہم کرنے کا بھی اہتمام کیا جائے گا۔ واضح رہے کہ ایجوکیشن سٹی اسٹیڈیم تک ٹرام کے ذریعے پہنچا جا سکتا ہے، وہاں ویسٹ پارکنگ، آکسیجن پارک، اور الشقاب پارکنگ میں پارکنگ کے لیے جگہ بھی موجود ہے۔
