ریاض: عسکری قوت کے اعتبار سے سعودی عرب خلیجی ممالک میں سرفہرست جبکہ عالمی اعتبار سے 25ویں نمبر پر ہے۔
سی این این میں شائع ہونے والی ’گلوبل فائر پاور‘ کی رینکنگ کے حوالے سے عرب ممالک میں سب سے بڑی عسکری قوت کا حامل سعودی عرب ہے جبکہ قطر کا رینکنگ میں درجہ سب سے کم ہے۔
سعودی مسلح افواج میں 2 لاکھ 30 ہزار سپاہی شامل ہیں جبکہ 848 مختلف قسم کے لڑاکا طیارے فضائی عسکری بیڑے کا حصہ ہیں، سعودی عرب کے پاس 1062 ٹینک، 12 ہزار بکتر بند اور دیگر ہیوی گاڑیاں موجود ہیں۔
سروے کے مطابق عرب ریاستوں میں عسکری قوت کے اعتبار سے دوسرا نمبر یو اے ای کا ہے جس کی مسلح افواج کی تعداد 64 ہزار ہے جبکہ ابوظبی کے فضائی بیڑے میں 540 لڑاکا طیارے، 510 ٹینک جبکہ 5900 عسکری ہیوی گاڑیاں اور بکتر بند شامل ہیں۔
فہرست میں تیسرے نمبر پر عمان ہے جس کے فوجیوں کی تعداد 42.5 ہزار ہے، عالمی سطح پر عمان کا نمبر 82 ہے، عمان کے پاس 175عسکری طیارے اور 117 ٹینک جبکہ دیگر عسکری گاڑیوں کی تعداد730 ہے۔
خلیجی ریاستوں میں کویت چوتھے اور عالمی سطح پر 84 ویں نمبر پر موجود ہے، کویتی مسلح افواج کی تعداد 39.5 ہے جبکہ کویتی فضائیہ میں 85 طیارے شامل ہیں، زمینی قوت کے اعتبار سے کویتی افواج کے ٹینکوں کی تعداد 567 اور دیگر عسکری گاڑیوں کی تعداد 700 ہے۔
سروے میں پانچویں نمبر پر بحرین کا نمبر ہے جس کی مسلح فوج 8200 سپاہیوں پر مشتمل ہے، منامہ کے پاس 107 لڑاکا طیارے اور 180 ٹینکوں کے علاوہ 700 مختلف نوعیت کی عسکری گاڑیاں شامل ہیں۔
فہرست میں قطر سب سے آخری درجے پر ہے جبکہ عالمی سطح پر دوحہ 106 ویں نمبر پر ہے، قطر کے فوجیوں کی تعداد 12 ہزار ہے جبکہ فضائی بیڑے میں 100 لڑاکا اور ٹرانسپورٹ طیارے شامل ہیں۔
