اسلام آباد : عالمی ادارہ صحت نے کورونا سے نمٹنے کیلئے پاکستان کے اقدامات کی تعریف کرتے ہوئے متوقع کورونا ویکسین کی فراہمی میں تعاون کی یقین دہانی کرا دی۔
تفصیلات کے مطابق عالمی ادارہ صحت نے حکومت پاکستان کے نام مراسلہ جاری کیا ہے ، جس میں کورونا سے نمٹنے کیلئے پاکستان کے اقدامات کی تعریف کرتے ہوئے کہا گیا ہے کہ پاکستان سے کورونا کے خلاف بھرپور تعاون جاری رہے گا، موثر و محفوظ کورونا ویکسین کی تیاری کیلئے کوششیں جاری ہیں، 2021 کے آغاز پر بعض کورونا ویکسین محدود پیمانے پر دستیاب ہوں گی۔
مراسلے میں کہا گیا ہے کہ آغاز میں عالمی سطح پرویکسین کی منصفانہ تقسیم یقینی بنانا ہوگی اور کورونا ویکسین کے درست اہداف کی بروقت نشاندہی ضروری ہے۔.
عالمی ادارہ صحت نے پاکستان کو متوقع کوروناویکسین کے بارے میں تعاون کی یقین دہانی کراتے ہوئے کہا کورونا ویکسین کے استعمال میں پاکستان کی معاونت کریں گے۔
ڈبلیو ایچ او نے پاکستان کو متوقع ویکسین کےاستعمال کیلئے تجاویز سے آگاہ کرتے ہوئے کہا پاکستان کو متوقع ویکسین کے امور پر توجہ دینا ہو گی اور متوقع کورونا ویکسین کیلئے پیشگی مؤثر پلاننگ کرنی ہوگی۔
مراسلے میں کہا گیا کہ پاکستان کورونا ویکسین کے استعمال کا مساوی، موثر عمل ترتیب دے اور کورونا ویکسینیشن کے مخصوص اہداف کی بروقت نشاندہی کرنے کے ساتھ ساتھ ویکسین کی ملک گیر ترسیل کی اسٹریٹجی وضع کرے۔
عالمی ادارہ صحت نے کہا کہ پاکستان متوقع کورونا ویکسین پر قومی رابطہ کمیٹی تشکیل دے ، رابطہ کمیٹی کورونا ویکسین پر پلاننگ و رابطوں کی ذمہ دار ہو گی۔
ڈبلیو ایچ او کی جانب سے مراسلے میں کہا گیا کہ پاکستان کورونا ویکسین پر قومی تکنیکی ورکنگ گروپ تشکیل دے اور ترسیل کیلئے لاجسٹک، کولڈچین سسٹم قائم کرے جبکہ ویکسین کی محفوظ ترسیل کیلئے سروس ڈیلیوری نظام تشکیل دے۔
عالمی ادارہ صحت کا کہنا تھا کہ پاکستان ویکسین کی محفوظ ترسیل کیلئے سروس ڈیلیوری نظام اور کورونا ویکسینیشن مہم کیلئے سرویلنس، مانیٹرنگ سسٹم تشکیل دینے کے ساتھ ساتھ ویکسین کے مضر اثرات جانچنے کیلئے سیفٹی سرویلنس سسٹم اور ڈیمانڈ جنریشن، کمیونیکشن پلان تیار کرے۔
مراسلے میں کہا گیا کہ پاکستان کورونا ویکسین نیشن بارے عوامی آگاہی کیلئے پیشگی مہم چلائے۔
