پشاور: ڈپٹی کمشنر کرم جاوید اللہ محسود پر حملہ کرنے والے شرپسندوں کی شناخت ہوگئی۔
اے آر وائی نیوز کے مطابق سرکاری ذرائع کا بتانا ہے کہ ڈی سی کرم جاوید اللہ محسود پر فائرنگ کرنے والوں کی بھی شناخت کرلی گئی ہے، حملے میں نامزد 5 ملزمان سمیت دیگر سہولت کاروں کے خلاف مقدمہ درج ہوگا۔
ذرائع کا بتانا ہے کہ آئی جی خیبرپختونخوا اتوار کو کوہاٹ میں اعلیٰ سطح اجلاس کریں گے جس میں آر پی او کوہاٹ، ڈی پی او کرم ودیگر اعلیٰ افسران شریک ہوں گے۔
سرکاری ذرائع کا کہنا ہے کہ چیف سیکریٹری خیبرپختونخوا بھی کوہاٹ جائیں گے۔
ذرائع کا بتانا ہے کہ ملوث افراد کو مقدمہ اندراج کے بعد فوری گرفتار کیا جائے گا اور انہیں قانون نافذ کرنے والے اداروں کے حوالے کیا جائے گا۔
یہ پڑھیں: لوئر کرم : ضلعی انتظامیہ کی گاڑی پر فائرنگ، ڈپٹی کمشنرجاوید اللہ محسود زخمی
واضح رہے کہ آج صبح لوئرکرم کے علاقے بگن میں ضلعی انتظامیہ کی گاڑی پر شرپسندوں نے فائرنگ کردی ، فائرنگ سے ڈپٹی کمشنرجاوید اللہ محسود زخمی ہوگئے۔
ضلعی انتظامیہ کا کہنا ہے کہ ڈپٹی کمشنر جاویداللہ محسود تحصیل لوئر علیزئی اسپتال منتقل کردیا ہے تاہم فائرنگ سے 2 ایف سی اہلکار بھی زخمی ہوئے ہیں۔
پولیس حکام کا کہنا ہے کہ فائرنگ فریقین نے نہیں کی نامعلوم افراد کی جانب سے کی گئی، تاہم ملزمان کی تلاش جاری ہے اور علاقے میں سرچ آپریشن شروع کردیا ہے
چیف سیکرٹری خیبرپختونخوا ندیم اسلم نے بتایا کہ ڈپٹی کمشنر کرم کی حالات خطرے سے باہر ہے، جاوید محسود بگن جا رہے تھے، ڈپٹی کمشنر کرم پر فائرنگ انتہائی افسوسناک ہے۔
وزیراعلیٰ نے بھی گن کے علاقے میں ڈپٹی کمشنر کرم پر شرپسندوں کی فائرنگ کے واقعے کی تصدیق کرتے ہوئے کہا کہ ڈپٹی کمشنر کرم کو 3 گولیاں لگیں تاہم حالت خطرے سے باہر ہے۔
