سینئر سیاستدان آصف کرمانی نے کہا ہے کہ نواز شریف نے ن لیگ کو عوامی جماعت بنایا تھا لیکن خوش آمدی ٹولے نے عوامی جماعت اور میاں نواز شریف کو ڈرائنگ روم میں پہنچا دیا۔
اے آر وائی نیوز کے پروگرام آف دی ریکارڈ میں گفتگو کرتے ہوئے سابق ن لیگی رہنما اور سینئر سیاستدان آصف کرمانی نے کہا ہے کہ ہمارے سیاسی نظام م یں اختلاف کی کوئی گنجائش نہیں، کوئی سیاسی اختلاف کرتا ہے تو اس کی گردن اتار دی جاتی ہے۔ میاں نواز شریف نظریاتی سیاست کرنا چاہتے تھے لیکن انہیں کرنے نہیں دی گئی۔
آصف کرمانی نے کہا کہ نواز شریف نے ن لیگ کو عوامی جماعت بنایا تھا۔ خوش آمدی ٹولے نے ن لیگ کا جو حشر کیا، وہ سب کے سامنے ہے۔ اس خوش آمدی ٹولے نے عوامی جماعت اور میاں نواز شریف کو ڈرائنگ روم میں پہنچا دیا ہے۔ انہیں اب پارٹی کے اندر سے بھی نظریاتی سیاست نہیں کرنے دی گئی ہے۔
ان کا کہنا تھا کہ وزیراعظم بننا نواز شریف کے لیے کوئی مسئلہ نہیں۔ ان کے سوا جتنے لوگ پارٹی میں ہیں، وہ کونسلر کا الیکشن بھی نہیں جیت سکتے۔
سابق ن لیگی رہنما نے مزید کہا کہ جب سے یہ حکومت آئی ہے عوام کو واضح طور پر کوئی ریلیف نہیں ملا۔ اصولوں کا گلا کاٹا، تو اس کا نتیجہ مل گیا اب یہ عوام میں گھوم کر دیکھیں۔ حکمرانوں کے لیے آج لوگوں کی آنکھوں میں غصہ اور نفرت ہے۔
آصف کرمانی نے کہا کہ حکمران آج جھوٹ بولتے ہیں کہ مہنگائی کم ہو گئی ہے۔ بجلی کے مہنگے بل سے بچتے ہیں، تو سوئی گیس کا عذاب سر پر آ جاتا ہے۔ آج 90 کی دہائی کا پاکستان نہیں، بلکہ اب نوجوان ڈگریاں لیے بے روزگار پھر رہا ہے۔
