کراچی : ود ہولڈنگ ٹیکس اور تاجر دوست اسکیم کے معاملے پر تاجر برادری نے ایک اور ہڑتال کا اعلان کردیا، آج بروز ہفتہ جوڑیا بازار بند رکھنے کا اعلان کیا گیا ہے۔
اے آر وائی نیوز کی رپورٹ کے مطابق ود ہولڈنگ ٹیکس کیخلاف ملک کی سب سے بڑی ہول سیل مارکیٹ آج بروز ہفتہ کو احتجاجاً بند رہے گی۔
ہڑتال کا اعلان کراچی میں جوڑیا بازار کے دکانداروں، امپورٹر اور ایکسپورٹرز کے ممشترکہ ہنگامی اجلاس میں کیا گیا۔
کراچی ہول سیل گروسرز ایسوسی ایشن جوڑیا بازار کے رہنما رؤف ابراہیم نے میڈیا سے گفتگو کرتے ہوئے کہا ہے کہ 31اگست کو ہول سیل گروسرز کی تمام مارکیٹس بند رہیں گی۔
انہوں نے کہا کہ آج صبح ساڑھے11بجے سٹی کورٹ کے سامنے پریس کانفرنس کرینگے، پریس کانفرنس میں آئندہ کے لائحہ عمل کا اعلان کیا جائے گا۔
یاد رہے کہ مہنگی بجلی اور ٹیکسوں کے خلاف تاجروں کی جانب سے 28 اگست کو کی جانے والی شٹرڈاؤن ہڑتال کی گئی جس میں ملک بھر کی بڑی مارکیٹیں بند رہیں۔
کراچی سے خیبر تک تمام چھوٹے بڑے کاروباری مراکز بند رہے، قصہ خوانی، اشرف روڈ، صدر بازار مارکیٹیں، صدر کی فوڈ اسٹریٹ چوک فوارہ میں دکانیں بند تھیں۔
