ریاض: کروناوائرس کے پیش نظر چین سے سعودی عرب پہنچنے والی دو غیرملکی خواتین کو عارضی پابندیوں کا سامنا ہے، انہیں اپنے عزیز واقارب سے بھی ملنے کی اجازت نہیں ہے۔
عرب میڈیا کی رپورٹ کے مطابق دونوں خواتین آپس میں بہن ییں اور تعلق بھارت سے ہے جو حال ہی میں چین سے سعودی عرب پہنچیں۔ سعودی متعلقہ اداروں نے خواتین کو حفاظتی انتظامات کے تحت علیحدہ رکھا ہوا ہے۔
3 فروری کو چین سے سعودی عرب آنے والی دونوں بہنوں کو کرونا وائرس کے شبے میں حفاظتی اقدامات کے تحت علیحدہ رکھا گیا ہے۔ انہیں لوگوں سے ملنے جلنے پر بھی پابندی ہے۔ سعودی محکمہ صحت کا کہنا ہے کہ دونوں خواتین اس وقت سعودی شہر دمام میں موجود ہیں۔
کروناوائرس سے ہلاکتوں کی تعداد 630 سے تجاوز کرگئی
شعبہ طب کا عملہ مسلسل خواتین کی نگرانی کررہا ہے۔ سعودی عرب پہنچنے پر دونوں بہنوں کو اسریننگ کے مراحل سے بھی گزارا گیا تاکہ کسی بھی قسم کے مہلک وائرس کا خاتمہ یقینی بنایا جاسکے۔ ابتدائی تحقیق سے یہ بات ثابت ہوئی ہے کہ دونوں خواتین کروناوائرس کے مرض سے پاک ہیں۔
خیال رہے کہ چین کرونا وائرس کی لپیٹ میں ہے، وائرس سے ہلاکتوں میں دن بہ دن اضافہ ہوتا جارہا ہے، چینی محکمہ صحت کے مطابق گزشتہ چوبیس گھنٹے کے دوران مزید تہترافراد موت کے منہ میں چلے گئے ، جس کے بعد ہلاکتوں کی تعداد 630 سے تجاوز کر گئی۔
