جس طرح جسم کے لیے نیند کی اہمیت سے انکار نہیں کیا جاسکتا، اسی طرح ایک اچھی نیند وہی کہلاتی ہے کہ جس میں انسان کو خواب نظر آئیں لیکن خوابوں سے متعلق اب تک معلومات خاصی محدود ہیں۔
خواب چلتی پھرتی تصاویر، خیالات، جذبات اور احساسات کا ایک ایسا مجموعہ ہیں جو نیند کی کُچھ حالتوں کے درمیان ہماری مرضی کے بغیر ہمارے دماغ میں پیدا ہوتے ہیں۔
اس حوالے سے اے آر وائی نیوز کے پروگرام باخبر سویرا میں نیورو سرجن ڈاکٹر مطیع الرحمان نے خواب اور ان کی کیفیات سے متعلق ناظرین کو آگاہ کیا۔
انہوں نے بتایا کہ تقریباً 95 فیصد خواب اس وقت تک ذہن سے نکل جاتے ہیں جب کوئی شخص نیند سے بیدار ہوتا ہے تاہم خواب دیکھنا آپ کو طویل مدتی یادوں کو یاد رکھنے میں مدد کرسکتا ہے۔
انہوں نے بتایا کہ نابینا افراد بصارت والے لوگوں کے مقابلے دوسرے حسی اجزاء کے ساتھ زیادہ خواب دیکھتے ہیں،
ڈاکٹر مطیع الرحمان نے کہا کہ ڈراؤنے خواب دیکھنے والے شخص کو کئی پریشان کن جذبات محسوس ہوتے ہیں، ڈراؤنے خوابوں پر عام ردعمل میں خوف اور اضطراب شامل ہیں لیکن یہ ذہن سے جلد ہی نکل جاتے ہیں۔
ڈراؤنے خوابوں کی کیفیت بالغوں اور بچوں دونوں میں یکساں ہوسکتی ہے اور اس کی نمایاں وجوہات میں تناؤ، خوف، صدمہ، جذباتی مشکلات، بیماری اور بعض ادویات کا استعمال بھی شامل ہے۔
نیورو سرجن کے مطابق ایسے ڈراؤنے خواب نیند کے اُس حصے میں آتے ہیں جب سونے کو دوران آنکھوں کی پُتلیاں گھومتی ہیں اور اس حالت کو آر ای ایم یعنی ریپیڈ آئی موومنٹ کہا جاتا ہے اس حالت میں مسلز ٹُون کا لیول کم ہوتا ہے جس کی وجہ سے انسان خواب کو واضح طور پر دیکھ پاتا ہے۔
اس حالت میں اعضاء کے پٹھے عارضی طور پر مفلوج ہوجاتے ہیں۔ دل کی دھڑکن بڑھ جاتی ہے، بلڈ پریشر بڑھتا ہے اور جب لوگ نیند کے دوران بیدار ہوتے ہیں تو وہ اکثر عجیب اور غیر منطقی کہانیاں بیان کرتے ہیں۔
ماہرین کے نزدیک یعنی ایک خواب بار بار دیکھنا دماغ کا ایک ایسا عمل ہے جو آپ کی توجہ روزمرہ زندگی میں کسی ایسی بات کی طرف دلانا چاہتا ہے جس پر آپ دھیان نہیں دے رہے اور جب آپ توجہ دیتے ہیں یا توجہ دینے کا وقت گُزار دیتے ہیں تب ایسے خواب آنا بند ہوجاتے ہیں۔
