راولپنڈی: بانی پاکستان تحریک انصاف (پی ٹی آئی) کی ہمشیرہ علیمہ خانم نے ان کے پارٹی کا پیٹرن ان چیف بننے کی اصل وجہ بتا دی۔
انسداد دہشتگردی عدالت کے باہر میڈیا سے گفتگو کرتے ہوئے علیمہ خانم نے بتایا کہ عمران خان سے کہا جا رہا ہے کہ حکومت کو قبول کریں اور 9 مئی واقعات پر معافی مانگیں۔
علیمہ خانم نے کہا کہ جب بھی احتجاج کی کال آتی ہے تو عمران خان کی رہائی کی باتیں شروع ہو جاتی ہیں، بھائی نے کہا ہے کہ احتجاجی تحریک کی ساری ذمہ داری عمر ایوب سنبھالیں گے جبکہ سلمان اکرم راجہ پارٹی کے فیصلوں پر عمل درآمد کروائیں گے۔
یہ بھی پڑھیں: دہشتگردوں کے پیٹرن ان چیف بانی پی ٹی آئی ہیں، طلال چوہدری
انہوں نے بتایا کہ عمران خان اپنی ٹیم تبدیل کرتے رہتے ہیں، انہوں نے پہلے کہا تھا وہ بطور چیئرمین احتجاجی تحریک کو لیڈ کریں گے لیکن انہیں بتایا گیا کہ بطور چیئرمین آپ لیڈ نہیں کر سکتے کیونکہ ٹیکنیکل مسئلہ ہے تو انہوں نے کہا کہ پھر میں پیٹرن ان چیف بن جاتا ہوں۔
ان کا کہنا تھا کہ بنیادی طور پر عمران خان خود احتجاجی تحریک کو لیڈ کرنا چاہتے ہیں۔
31 مئی کو سینیٹر علی ظفر نے میڈیا سے گفتگو کرتے ہوئے کہا تھا کہ عمران خان نے حکومت کے خلاف احتجاجی تحریک شروع کرنے کا اعلان کر دیا ہے جس کا مرکز اسلام آباد نہیں ہوگا بلکہ ملک بھر میں احتجاجی تحریک چلائیں گے۔
سینیٹر علی ظفر کا کہنا تھا کہ عمران خان نے کہا کہ ہمیں دیوار سے لگایا گیا اور اب کوئی راستہ نہیں بچا، ہمارے پاس سڑکوں پر آنے کے علاوہ کوئی آپشن نہیں بچا۔
انہوں نے بتایا کہ بانی پی ٹی آئی نے کہا ہے احتجاجی تحریک سے متعلق تمام ہدایات جیل سے دوں گا۔
ان کا کہنا تھا کہ عمران خان نے مجھے ذمہ داری دی ہے کہ احتجاجی تحریک کا پلان بنا کر دوں، ان سے آئندہ ملاقات پر احتجاج تحریک کا پلان پیش کروں گا۔
رہنما پی ٹی آئی نے کہا کہ سابق وزیر اعظم بہت سنجیدہ ہیں اب جو تحریک چلے گی ایسی پہلے کبھی نہیں چلی ہوگی، تحریک چلانے میں رکاوٹیں آتی ہیں لیکن ہمیں بھی طریقے آتے ہیں۔
