کراچی : سابق میئر مصطفیٰ کمال نے شہر قائد کے حالات سے متعلق کہا ہے کہ میئر کراچی صرف ٹی وی پر آکر باتیں کرتے ہیں، اختیارات نہیں ملتے تو وزیر اعلیٰ کے گھر کے سامنے دھرنا دیتے۔
ان خیالات کا اظہار پاک سرزمین پارٹی کے رہنما و سابق میئر مصطفیٰ کمال نے اے آر وائی نیوز کے پروگرام دی رپورٹر میں گفتگو کرتے ہوئے کہا کہ سندھ حکومت کہتی ہے میئر کراچی وسیم اختر کو 48 ارب دئیے ہیں جبکہ میئر کراچی کہتا ہے مجھے 15 ارب روپے ملے ہیں۔
انہوں نے کہا کہ کراچی میں 2،2 کروڑ کے ساڑھے سات سو منصوبے بن سکتے ہیں لیکن کراچی کے چوکیداروں نے ہی کراچی کو لوٹا ہے۔
مصطفیٰ کمال کا کہنا تھا کہ اختیارات نہیں ملتے تو وزیراعلیٰ کے گھر کے سامنے دھرنا دیتے لیکن وسیم اختر کو صرف ٹی وی پر باتیں کرنا آتی ہیں۔
سابق میئر کا کہنا تھا کہ وسیم اختر اختیارات کا رونا کیوں روتے ہیں جو اختیار میں ہے وہ تو کرو۔
سربراہ پاک سرزمین پارٹی نے کہا کہ کراچی میں مافیاز کو سندھ حکومت ختم کرے، کراچی کا حل باکردار قیادت ہے۔
