پاکستان کی معروف اداکارہ سارہ لورین نے بالی وڈ کے میں کام کرنے کے بعد پاکستان فلم انڈسٹری میں کام نہ کرنے کی اہم وجہ بتا دی ہے۔
ایک انٹرویو میں سارہ لورین سے پوچھا گیا کہ وہ کافی عرصے سے کسی پاکستانی پروجیکٹ میں نظر نہیں آئیں اور اس کی وجہ کیا ہے۔
سارہ لورین نے اس کے جواب میں کہا کہ ایک بار جب آپ بالی وڈ میں قدم رکھتے ہیں تو بہت سے پاکستانی سمجھتے ہیں کہ اب آپ یہاں کوئی پیش کش قبول نہیں کریں گے۔
اداکارہ نے کہا کہ لوگ سمجھتے ہیں کہ آپ کو اسکرپٹ کی پیش کش آنا بند ہو جائے گی اور میں اس کا سامنا کر چکی ہوں۔
اس سے قبل ایک انٹرویو میں سارہ لورین کا کہنا تھا کہ لوگوں کو اس بارے میں نہیں معلوم کہ میں نماز پڑھتی ہوں اور اعتکاف میں بھی بیٹھتی ہوں، 12 سال کی عمر سے اعتکاف میں بیٹھ رہی ہوں، جب بھی مشکل میں ہوتی ہوں تو اللّہ سے رجوع کرتی ہوں۔
ان کا کہنا تھا کہ لوگ مجھے عیسائی سمجھتے ہیں، جب بھارت سے پاکستان واپس آئی تھی تو بہت پریشان تھی، پھر میں کچھ دن اعتکاف میں بیٹھی جس کے بعد زندگی بہتر ہوگئی۔
سارہ لورین نے انٹرویو میں بالی وڈ میں کام کرنے کی وجہ بھی بتائی تھی۔ انہوں نے کہا تھا کہ میں نے بالی وڈ میں کام کرنے کو ترجیح دی کیوں کہ وہ ایک بڑی اور اچھی طرح سے قائم کی گئی انڈسٹری ہے۔
سارہ لورین نے اے آر وائی ڈیجیٹل کے ڈرامے ”رابعہ زندہ رہے گی“ سے اداکاری کا آغاز کیا۔ بعد میں انہوں نے پوجا بھٹ کی فلم ”کجرارے“ سے بالی وڈ میں قدم رکھا۔ 2013 کی فلم ”مرڈر 3“ میں اپنے کردار سے شہرت پائی۔
