نئی دہلی : بھارت میں قتل کا عجیب و غریب واقعہ پیش آیا ہے جس میں ایک عورت نے اپنے خاوند کو قتل کرنے کے بعد فیس بک پر اسٹیٹس اپلوڈ کردیا۔
بھارتی میڈیا کے مطابق بھارت کے دارالحکومت نئی دہلی کی رہائشی خاتون رینوکا شرما نے جھگڑے کے بعد اپنے شوہر چراغ شرما کو تیز دھار آلے سے قتل کردیا اور بعد ازاں خود کشی کرنے کی کوشش بھی کی۔
مذکورہ واقعہ نئی دہلی کے علاقے چھترپور میں پیش آیا، 36سالہ خاتون نے قتل کی واردات کے بعد اپنے فیس بک اکاؤنٹ سے اسٹیٹس لگا دیا جس کے بعد اس کے پڑوسیوں نے فوری طور پر پولیس کو اطلاع دی۔
پولیس نے مذکورہ واقعے کی تصدیق کرتے ہوئے بتایا کہ 37سالہ مقتول چراغ شرما کے پڑوسیوں اور مالک مکان کی کال پر پولیس فوری طور پر اپارٹمنٹ پہنچی۔
پولیس کا کہنا تھا کہ اپارٹمنٹ کا دروازہ اندر سے بند تھا، دروازہ توڑنے پر دیکھا کہ گھر کے فرش پر خون پھیلا ہوا تھا جبکہ خون کے نشانات دیواروں پر بھی موجود تھے۔
پولیس افسر کے مطابق کمرے میں خاتون کے شوہر کی خون آلود نعش زمین پر پڑی تھی جبکہ مذکورہ خاتون بھی شدید زخمی حالت میں شوہر کی نعش کے قریب بےہوش پڑی تھی۔
پولیس نے نعش کو قبضے میں لیا اور زخمی ملزمہ کو طبی امداد کیلئے اسپتال منتقل کیا، خاتون اس وقت زندہ ہے اور اس کا دہلی کے ایمز اسپتال میں علاج بھی جاری ہے، ملزمہ کیخلاف قتل کا مقدمہ درج کرلیا گیا ہے تاہم اس کا بیان اب تک نہیں لیا جاسکا۔
بھارتی میڈیا کے مطابق دونوں میاں بیوی ایک انشورنس کمپنی میں ملازم تھے اور ان کی کوئی اولاد بھی نہیں ہے۔ ابتدائی اطلاعات میں یہ بات سامنے آئی ہے کہ جوڑے کے درمیان کافی رنجش تھی جس کے پیش نظر میں یہ افسوسناک واقعہ رونما ہوا۔
