کھٹمنڈو: نیپال میں جنگلی ہاتھی نے مقامی شہری پر حملہ کرکے موت کے گھاٹ اتار دیا۔
تفصیلات کے مطابق نیپال کے مغربی علاقے میں واقع نیشنل پارک کے قریب ہاتھی نے راہ گیر پر حملہ کرکے موقع پر ہی ہلاک کردیا۔
غیر ملکی خبررساں ادارے کے مطابق نیشنل پارک کے نزدیک جنگل سے نکل کر اچانک ہاتھی نے شہری پر حملہ کردیا، جس سے ان کے جسم کی ہڈیاں چور ہوگئیں۔
پولیس کا کہنا ہے کہ ہاتھی کے حملے کے بعد شہری کا جسم زخموں سے چور اور لہولہان تھا جس کے باعث وہ زخموں کی تاب نہ لاتے ہوئے موقع پر ہی ہلاک ہوگیا۔
انتظامیہ کے مطابق جنگلوں میں غذا نہ ملنے کے باعث جنگلی جانور شہریوں پر حملہ کررہے ہیں، اس سے قبل جولائی میں بھی اس علاقے میں ایک ہاتھی کے حملے میں ایک باسٹھ سالہ شخص مارا گیا تھا۔
نیپال میں حالیہ عرصے کے دوران جنگلی جانوروں اور انسانوں کے مابین ٹکراؤ میں اضافہ ہوا ہے، جس کی وجہ ان جانوروں کے لیے قدرتی ماحول کی خرابی قرار دیا جاتا ہے۔
خیال رہے کہ تھائی لینڈ، نیپال اور بھارت میں ہاتھی بڑی تعداد میں پائے جاتے ہیں، رواں سال فروری میں بھارتی ریاست جھارکنڈ کے مغربی ضلع سنگھ بھم کے علاقے منوہرپوت میں ہاتھیوں نے کھانے کی تلاش میں ایک گھر میں گھس کر گھروالوں پر حملہ کرکے اہل خانہ کو روند ڈالا تھا۔
آرنلڈ شوازینگر کی گاڑی پر ہاتھی کا حملہ
ہندوستان میں ہاتھیوں کے جھنڈ پہلے بھی کئی علاقوں پر حملہ کرچکے ہیں، ایک اعداد وشمار کے مطابق سن 2000 سے لے کر اب تک صرف جھاڑکنڈ میں 1000 افراد ہاتھیوں کے غضب ناک حملوں کا نشانہ بن چکے ہیں۔
