پشاور: محکمہ جنگلی حیات نے سانپ کی کھال کی غیر قانونی اسمگلنگ میں ملوث گروہ کو گرفتار کر لیا، ملزمان سانپ کی کھال کو مظفرآباد منتقل کر رہے تھے۔
تفصیلات کے مطابق محکمہ جنگلی حیات خیبرپختونخوا نے کارروائی کرتے ہوئے سانپ کی کھال کی غیر قانونی اسمگلنگ کرنے والے گروہ کو گرفتار کر لیا۔
ترجمان محکمہ جنگلی حیات لطیف الرحمن نے بتایا کہ ملزمان سانپ کی کھال شاہ مقصود ہری پور سے لے جاتے ہوئے گرفتار کئے گئے۔
حیات لطیف الرحمن کا کہنا تھا کہ ملزمان کا تعلق راولپنڈی سے ہے اور سانپ کی کھال کو مظفرآباد منتقل کر رہے تھے۔
ترجمان نے مزید بتایا کہ سانپ کی کھال کی لمبائی دس فٹ چار انچ ہے، ماہرین کے مطابق تھائی لینڈ اور چاپان میں سانپ کی کھال کو ادویات کی تیاری میں استعمال کیا جاتا ہے۔
محکمہ جنگلی حیات کے ترجمان نے کہا کہ یورپی ممالک میں سانپ کی کھال کھال سے جوتے ، پرس اور ملبوسات بھی تیار کئے جاتے ہیں۔
ترجمان کے مطابق ہزارہ ڈویژن نایاب اور قیمتی حشرات کا مسکن ہے اور بڑی تعداد میں مختلف حشرات ہزارہ ڈویژن میں پائے جاتے ہیں ، قیمتی حشرات کی موجودگی کی وجہ سے بین الاقوامی سمگلروں کارخ یہاں پر زیادہ ہے۔
حیات لطیف الرحمن کا کہنا تھا کہ اسمگلر یہاں کے مقامی لوگوں کے ساتھ رابطے میں رہتے ہیں جو جنگلات اور دو افتادہ علاقوں میں رہتے ہیں۔
