سردی کے موسم کے آغاز سے ہی خواتین بالوں کے حوالے سے مختلف مسائل کا شکار ہوجاتی ہیں گھنے سے گھنے بالوں میں بھی گرنے کمزور پڑجانے اور خشکی جیسی شکایات بڑھ جاتی ہیں۔
اس کے علاوہ اکثر لوگ سردیوں میں روزانہ نہیں نہاتے جس کی وجہ سے بھی بالوں کی جڑوں میں پسینہ جمنے کی شکایت پیدا ہوجاتی ہے جو خشکی کا باعث بنتی ہے۔
اے آر وائی نیوز کے پروگرام باخبر سویرا میں ماہر امراض جلد ڈاکٹر کاشف احمد ملک نے موسم سرما میں بالوں کی حفاظت کے حوالے سے ناظرین کو مفید مشورے دیئے۔
انہوں نے بتایا کہ سر میں خشکی پیدا ہونے کی اہم وجہ سردیوں میں چائے کافی کا زیادہ پینا اور پانی کا کم استعمال ہے، جس سے ہیمو گلوبن کم ہونا شروع ہوجاتا ہے لہٰذا اپنا ہیمو گلوبن بہتر کرتے ہوئے اسے چیک کرتے رہنا چاہیے۔
ڈاکٹر کاشف نے بالوں کی حفاظت اور نشونما کیلئے ایک بہترین گھریلو نسخہ بتانے کی ترکیب بتائی کہ ایک چمچ چقندر کا پیسٹ، ایک چمچ ایلو ویرا جیل اور آّدھا چمچ لیموں کا رس، سب کو ملاکر نہانے سے دو گھنٹے پہلے لگالیں اس کے فوائد آ پ کو نظر آّنا شروع ہوجائیں گے۔
ایک سوال کے جواب میں ان کا کہنا تھا کہ بالوں کے مسائل کی بڑا سبب ہیر ڈرائیر کا استعمال بھی ہے، اس مسائل سے چھٹکارے کا آسان حل یہ ہے کہ کوکونٹ آئل میں تھوڑا سا پانی ملاکر اسے اسپرے بوتل میں ڈال لیں اور نہانے کے بعد سر پر لگالیں۔ یہ موئسچرائزر کا کام کرے گا۔
ڈاکٹر کاشف احمد ملک نے کہا کہ سردیوں میں بے شک روز نہ نہائیں لیکن ایک دن چھوڑ کر دوسرے دن بال ضرور دھولیں۔ خواتین کی نسبت مردوں کو زیادہ اپنے بال دھونے چاہیئں۔ اگر ہوسکے تو ات کو سونے سے پہلے بالوں کی جڑوں میں ہلکا سا تیل لگالیں۔
انہوں نے کہا کہ موسم سرما شروع ہوتے ہی نہ صرف آپ اپنی جِلد کی حفاظت کی روٹین میں تبدیلی لانے پر توجہ دیں بلکہ بالوں کی حفاظت کے انداز بھی بدل لیں تاکہ کسی تقریب میں آپ کے خوبصورت بالوں کی چمک اور دلکشی ماند نہ پڑے۔
