خیبرپختونخوا، بلوچستان اور پنجاب کے بعد سندھ کے تعلیمی اداروں میں موسم سرما کی چھٹیوں کا اعلان کر دیا گیا۔
محکمہ تعلیم سندھ نے موسم سرما کی تعطیلات کا اعلان کر دیا ہے جس کے مطابق صوبے بھر کے تعلیمی اداروں میں 21 دسمبر سے 31 تک تعطیلات ہوں گی۔
فیصلے کا اطلاق تمام نجی و سرکاری اداروں پر ہوگا۔
خیبرپختونخوا
محکمہ تعلیم خیبرپختونخوا کے مطابق کے پی کے میدانی علاقوں میں اسکول 22 دسمبر سے 31 دسمبر تک بند رہیں گے جبکہ صوبے کے پہاڑی علاقوں میں اسکول 22 دسمبر سے 28 فروری تک بند رکھنے کا اعلان کیا گیا ہے۔
پنجاب
پنجاب کے تعلیمی اداروں میں موسم سرما کی چھٹیوں کا نوٹیفکیشن جاری کردیا گیا ہے، نوٹیفکیشن کے تحت صوبہ پنجاب کے تعلیمی اداروں میں سردیوں کی تعطیلات 20 دسمبر سے 10 جنوری تک ہوں گی۔
جاری نوٹیفکیشن میں بتایا گیا ہے کہ 11 اور 12 جنوری کو ہفتہ وار تعطیل ہوگی جس کے بعد تعلیمی ادارے 13 جنوری کو کھلیں گے۔
بلوچستان
بلوچستان کے تعلیمی اداروں میں 16دسمبر سے موسم سرما کی تعطیلات کا آغاز ہو گیا ہے، محکمہ تعلیم بلوچستان کے مطابق کوئٹہ سمیت 20 اضلاع کے اسکول، کالج اور جامعات بند ہو گئی ہیں۔
نوٹیفکیشن کے مطابق کوئٹہ کے سرد علاقوں میں تعطیلات 28 فروری تک جاری رہیں گی جبکہ گرم علاقوں میں موسم سرما کی 10 روزہ تعطیلات کا اعلان کیا گیا ہے۔ نوٹیفکیشن کے مطابق بلوچستان کے گرم علاقوں میں تعطیلات یکم جنوری سے 10 جنوری تک ہوں گی۔
