وسکونسن: امریکا میں کرسمس پریڈ میں شہریوں پر اچانک ایک پاگل شہری نے گاڑی چڑھا دی، جس سے 5 افراد ہلاک ہو گئے۔
تفصیلات کے مطابق امریکی ریاست وسکونسن کے شہر واکیشا میں کرسمس پریڈ جاری تھی، کہ اچانک ایک کار پریڈ کی ایک قطار میں کھڑے شہریوں پر چڑھ دوڑی۔
ڈرائیور نہایت بے دردی کے ساتھ شہریوں کو رگیدتا ہوا گیا، جس سے پانچ افراد ہلاک جب کہ 40 سے زائد زخمی ہو گئے، زخمیوں میں بچے بھی شامل تھے، فائر چیف سٹیون ہاورڈ نے صحافیوں کو بتایا کہ اسپتال لے جانے والوں میں 12 بچے شامل ہیں۔
پولیس کے مطابق پریڈ میں اسکول کے بچوں کا ایک بینڈ اور ایک ڈانس گروپ شامل تھا، جو ایک سڑک پر گزر رہا تھا، ایسے میں ایک سرخ رنگ کی SUV تیزی سے سڑک پر آئی، اور لوگوں کو کچلتی ہوئی گزر گئی۔
گاڑی کی زد پر بچوں سمیت درجنوں لوگ آئے، جن میں پانچ افراد زخموں کی تاب نہ لاتے ہوئے مر گئے، پولیس حکام کا کہنا ہے کہ واقعے سے متعلق ابھی ایسے شواہد نہیں ملے ہیں جن پر اسے دہشت گردی قرار دیا جائے۔
WARNING: Graphic footage
Top-down video footage shows a driver deliberately plowing through a Christmas parade in Waukesha, Wisconsin. pic.twitter.com/fo5xXPF12q
— The Post Millennial (@TPostMillennial) November 22, 2021
سیکیورٹی حکام کی بریفنگ کے مطابق حادثے کے بعد ایک شخص کو حراست میں لے لیا گیا ہے، پولیس اہلکار نے گاڑی کو روکنے کے لیے فائرنگ بھی کی تھی، تاہم اس کی فائرنگ سے کوئی شخص زخمی نہیں ہوا۔
سیکیورٹی حکام کا کہنا تھا کہ ایسا لگتا ہے کہ مشتبہ شخص کسی دوسری واردات سے فرار ہو رہا تھا، جب وہ پریڈ میں موجود لوگوں پر چڑھ دوڑا۔
حادثے کے بعد آج پیر کے دن علاقے کے اسکولوں کو بند کر دیا گیا ہے جب کہ آمدو رفت کے لیے سڑکیں بھی بند ہیں۔
