سیف علی خان نے انکشاف کیا ہے کہ سنجے لیلا بھنسالی نے مشہور زمانہ فلم دیوداس میں چنی لال کا کردار ادا کرنے کے لیے پہلے رابطہ کیا مگر پھر میرے علم میں لائے بغیر یہ رول کسی اور کو دے دیا۔
بالی وڈ کے چھوٹ نواب سیف علی خان کے حوالے سے یہ بات انڈسٹری میں زیرِگردش رہی ہے کہ انھوں نے فلم ’’رہنا ہے تیرے دل میں‘‘ کے لیے سپورٹنگ رول کرنے کو ترجیح دی جب کہ سنجے لیلا بھنسالی کی فلم ’’دیوداس‘‘ میں معاون کردار ادا کرنے سے انکار کردیا تھا۔
صحافی نیلوفر قریشی کو دیے گئے انٹرویو میں انھوں نے واضح کیا کہ سنجے لیلا بھنسالی مجھے لااُبالی سمجھتے تھے مگر انھوں نے سنجے کی فلم میں کام کرنے سے انکار نہیں کیا تھا بلکہ ہمارے درمیان معاوضے پر تھوڑی غلط فہمی پیدا ہوگئی تھی، میں یہ بھی بتاتا چلوں کہ میں نے ان سے کسی خطیر رقم کا مطالبہ نہیں کیا تھا۔
سیف نے بتایا کہ معاوضے کے حوالے سے مجھ سے کوئی بات کرنے سے پہلے ہی ہدایت کار نے اس باب کو بند کردیا، کسی نے مجھے بتانا تک ضروری نہیں سمجھا کہ فلم کے حوالے سے بات چیت ختم ہوگئی ہے۔
اداکار نے بتایا کہ جب میں نے خود فون کیا تو مجھے پتا چلا، اگر مجھے کاسٹ کر بھی لیا جاتا تو شاید میں چنی لال کے کردار کے لیے اتنا موزوں نہ ہوتا، واضح رہے کہ فلم میں چنی لال کا کردار جیکی شروف نے ادا کیا تھا۔
