بھارت کے دارالحکومت نئی دہلی میں نامعلوم ملزم نے پیچ کس (اسکریو ڈرایور) کے وار کر کے خاتون ٹیچر اور ان کے چھوٹے بھائی کو موت کے گھاٹ اتار دیا۔
میڈیا رپورٹس کے مطابق پولیس نے بتایا کہ قتل کا ہولناک واقعہ شکر پور میں پیش آیا، بدھ کی صبح 30 سالہ اسکول ٹیچر (کملیش) اور ان کے 17 سالہ بھائی (رام پرتاپ) کی لاش گھر سے ملی۔
کملیش کا تعلق شکرپور سے تھا جبکہ رام پرتاپ اتر پردیش کا رہائشی تھا۔
پولیس کو صبح 10 بج کر 11 منٹ پر نامعلوم نمبر سے کال موصول ہوئی کہ کملیش اور رام پرتاپ کی لڑائی ہوئی ہے اور ان میں سے ایک زخمی بھی ہے۔
قانون نافذ کرنے والا ادارہ فوری طور پر موقع پر پہنچ گیا جہاں انہیں کملیش اور رام پرتاپ کی لاشیں ملیں۔
پولیس کے مطابق کملیش صاحب آباد میں اسکول ٹیچر کے طور پر کام کرتی تھیں جبکہ ان کا بھائی 12ویں کلاس کا طالب علم تھا جو 12 اپریل کو بھتیجے کی سالگرہ منانے کیلیے بہن کے گھر آیا تھا۔
ابتدائی تحقیقات کے مطابق کملیش اور ان کے شوہر شریانش کمار کے درمیان لڑائی ہوئی تھی لیکن جب پولیس وہاں پہنچی تو مقتولہ کا شوہر غائب تھا۔
بعدازاں، شریانش کمار پولیس کے سامنے پیش ہو کر تحقیقات میں شامل ہوئے جنہیں بے گناہ قرار دیا گیا۔ پولیس کو جائے وقوعہ اسکریو ڈرایور ملا ہے جو قتل کی واردات میں استعمال کیا گیا۔
معاملے کی مزید تحقیقات کی جا رہی ہیں۔
