ٹی وی کی براہ راست نشریات کے دوران کوئی نہ کوئی ایسا واقعہ پیش آجاتا ہے جو ناظرین کو حیران و پریشان یا ہنسنے پر مجبور کردیتا ہے۔
ایسا ہی ایک اور واقعہ امریکی شہر پنسلوینیا میں بھی پیش آیا جب براہ راست نشریات کے دوران کیمرے کے سامنے ایک خاتون نے رقص شروع کردیا۔
یہ واقعہ اس وقت پیش آیا جب برطانوی ٹی وی چینل 4 کے معروف صحافی گیری گبون براہ راست اپنا تجزیہ پیش کر رہے تھے۔
وہ برطانوی وزیر اعظم تھریسا مے کے دورہ امریکا کے موقع پر وہاں موجود تھے اور اس بات سے عوام کو آگاہ کر رہے تھے کہ مستقبل قریب میں برطانیہ اور امریکا کے تعلقات کس نوعیت کے ہوں گے۔
مزید پڑھیں: براہ راست ٹی وی نشریات کے دوران خاتون غائب
لیکن ان کے تجزیے کے درمیان ان کی پشت پر کھڑی ایک سیاہ فام خاتون نے رقص شروع کردیا جس کے بعد ناظرین کی ساری توجہ سنجیدہ تجزیے سے ہٹ کر اس خاتون کی طرف مبذول ہوگئی۔
خاتون نے ایک پلے کارڈ بھی اٹھایا ہوا تھا جس پر ’بلیک کینڈی میٹرز‘ رقم تھا۔
گیری گبون اپنے طویل صحافتی تجربے کے باعث اس بات میں تو کامیاب رہے کہ اپنی توجہ کو مرکوز رکھیں اور بھٹکنے نہ دیں، مگر وہ خود بھی جانتے تھے کہ خاتون کے مضحکہ خیز رقص کے بعد ان کا سنجیدہ تجزیہ کسی نے بھی نہیں سنا ہوگا۔
