لاہور: صوبہ پنجاب کے نواحی علاقے ٹبہ سلطان پور میں طبی عملے کی بے حسی اور غفلت کے باعث حاملہ خاتون نے واش روم میں بچے کو جنم دے دیا، بروقت آکسیجن نہ ملنے کے باعث نومولود بچہ جاں بحق ہوگیا۔
تفصیلات کے مطابق صوبہ پنجاب کے ٹاؤن ٹبہ سلطان پور کے رورل ہیلتھ سینٹر گڑھا موڑ میں عملے کی بدترین غفلت سامنے آگئی۔
ہیلتھ سینٹر میں بچے کی ڈیلیوری کے لیے آنے والی خاتون کی حالت غیر ہوگئی تاہم عملے نے طبی امداد دینے سے انکار کردیا، ایمرجنسی روم بند ہونے کے باعث خاتون نے واش روم میں بچے کو جنم دے دیا۔
بروقت آکسیجن نہ ملنے کے باعث بچہ جاں بحق ہوگیا۔
ذرائع کا کہنا ہے کہ اسپتال عملے نے خاتون کو طبی امداد دینے کے بجائے اپنے کمرے کا دروازہ بند کر لیا۔
خاتون کے ورثا کا کہنا ہے کہ صبح کے وقت عملہ اسپتال میں ڈیوٹی کے بجائے سو رہا تھا۔
متاثرہ خاتون کے ورثا نے رورل ہیلتھ سینٹر گڑھا موڑ عملہ کے خلاف احتجاج شروع کردیا، ورثا نے وزیر اعلیٰ پنجاب سے نوٹس لینے کا مطالبہ کیا ہے۔
