راجستھان: بھارتی ریاست راجستھان کے شہر پرتاب گڑھ میں ایک حاملہ خاتون کو شوہر نے برہنہ کر کے پریڈ کروایا، پولیس نے انکشاف کیا ہے کہ واقعے میں سسرال والے بھی ملوث تھے، جس پر 8 افراد کو گرفتار کر لیا گیا ہے۔
بھارتی میڈیا رپورٹس کے مطابق راجستھان کے شہر پرتاپ گڑھ میں 31 اگست کو خاندانی جھگڑے کے باعث سسرال والوں نے 21 سالہ حاملہ خاتون کو برہنہ کر کے راستے میں پریڈ کروایا جس کی دل دہلا دینے والی ویڈیو وائرل ہو گئی ہے۔
واقعے پر وزیر اعلیٰ اشوک گہلوت نے پولیس حکام کو سخت کارروائی کی ہدایت کی جس کے بعد پولیس نے 8 افراد کو گرفتار کر لیا ہے، جب کہ واقعے میں ملوث شوہر کو پہلے ہی گرفتار کیا جا چکا ہے۔ یہ افسوس ناک واقعہ دریاواڑ تھانے کی حدود میں گاؤں نچل کوٹا میں پیش آیا، متاثرہ خاتون اور ملزم دونوں کا تعلق قبائلی برادری سے ہے، پولیس کے مطابق ایف آئی آر درج کر لی گئی ہے۔
حاملہ بیوی کو برہنہ کر کے سرِ عام پریڈ کروانے والا شوہر گرفتار
ریاستی حکومت اس کیس کو سنجیدگی سے لے رہی ہے، وزیر اعلیٰ گہلوت کے مطابق ملزمان کے خلاف مقدمہ فاسٹ ٹریک کورٹ میں چلایا جائے گا۔ بھارت کی مختلف ریاستوں میں آئے دن خواتین کے ساتھ انسانیت سوز سلوک کے اسی طرح کے واقعات رونما ہو رہے ہیں، پرتاپ گڑھ کے اس واقعے پر وومین کمیشن نے بھی سخت نوٹس لیا ہے۔
