خاتون کی گاڑی چرانے والے چور کو لینے کے دینے پڑ گئے واقعے کی ویڈیو سوشل میڈیا پر وائرل ہوگئی۔
سوشل میڈیا پر ایک ویڈیو وائرل ہورہی ہے جس میں خاتون نے گاڑی چرانے والے مبینہ چور کو اپنی مرسڈیز بینز کے اندر ہی بند کرکے پولیس کو بلا کر اسے گرفتار کروادیا۔
طالبہ نے کلپ کو فیس بک پر شیئر کرتے ہوئے لکھا کہ ’ایک شخص نے میری مرسڈیز اے 45 چرانے کی کوشش کی۔‘
گاڑی کی مالکن کے مطابق اس شخص نے گاڑی کے اگنیشن بٹن تک پہنچ کر گاڑی اسٹارٹ کرنے کی کوشش کی لیکن وہ ناکام رہا۔
طالبہ نے اپنی مرسڈیز گاڑی کو 29 ستمبر کی رات گھر کے باہر کھڑا کیا تھا، اسی دوران انہوں نے دیکھا کہ کوئی شخص گاڑی کے اندر موجود ہے، خاتون نے وقت ضایع کیے بغیر گاڑی کی چابیاں اٹھائیں اور گاڑی کو دور سے ہی لاک کردیا۔
چور پولیس کے آنے تک گاڑی کے اندر ہی بند رہا، طالبہ نے بتایا کہ جب بھی اس شخص نے باہر نکلنے کی کوشش کی اس نے لگژری گاڑی کو دوبارہ لاک کیا اور کچھ کوششوں کے بعد اس نے ہار مان لی۔
طالبہ نے بتایا کہ اس شخص کو پولیس ہتھکڑیاں لگا کر تھانے لے گئی۔
