رحیم یارخان: اتائی ڈاکٹر کے مبینہ طور پر غلط انجکشن لگانے سے ایک خاتون بازو سے محروم ہو گئی۔
تفصیلات کے مطابق رحیم یار خان کے نواحی علاقے کے اتائی ڈاکٹر نے چند روز قبل خاتون کو بخار کا انجکشن لگایا تھا، جس کی وجہ سے بازو ناکارہ ہو گیا ہے۔
خاتون کے ورثا کا کہنا ہے کہ انجکشن لگنے کے بعد مریضہ کی حالت مزید بگڑ گئی، اور بازو کا رنگ سیاہ ہونا شروع ہو گیا، جب خاتون کو شیخ زید اسپتال لایا گیا تو ڈاکٹروں نے معائنے کے بعد بازو کاٹنے کا مشورہ دے دیا ہے۔
ترجمان شیخ زید اسپتال نے اپنے بیان میں کہا ہے کہ خاتون کی زندگی بچانے کے لیے بازو کاٹنا پڑا۔
خاتون کے ورثا کا کہنا ہے کہ انھوں نے سی ای او ہیلتھ کو اتائی ڈاکٹر کے خلاف درخواست دی ہے، لیکن اس پر تاحال کوئی کارروائی نہیں ہوئی۔
