بھارتی ریاست راجستھان کے شہر جے پور میں بیوی نے آشنا کے ساتھ مل کر شوہر کو بے دردی سے قتل کیا اور پھر ثبوت چھپانے کیلیے لاش جلا دی۔
انڈین میڈیا کی رپورٹس کے مطابق جے پور پولیس نے بتایا کہ مقتول کی شناخت دھنلال سینی کے نام سے ہوئی جس کی موت سر پر گہری چوٹ لگنے کے باعث ہوئی۔
سوشل میڈیا پر وائرل متعدد ویڈیوز میں خاتون اور اس کے آشنا کو مقتول کی لاش کو موٹر سائیکل پر لے جاتے ہوئے دیکھا جا سکتا ہے۔
ڈی سی پی ساؤتھ دیگنت آنند نے واقعے کی تصدیق کرتے ہوئے بتایا کہ مقتول کی بیوی گوپالی دیوی اور اس کے آشنا دیال کو گرفتار کر لیا گیا، واقعہ اُس وقت پیش آیا جب دھنلال سینی نے بیوی سے غیر ازدواجی تعلقات کے بارے میں پوچھا۔
یہ بھی پڑھیں: خاتون نے آشنا کیساتھ مل کر شوہر کو قتل کیا، لاش سیمنٹ سے بھرے ڈرم میں ڈال دی
دیگنت آنند کے مطابق اس دوران دونوں میں جھگڑا ہوا تو خاتون اور آشنا نے مقتول کے سر پر لوہے کی راڈ مار دی جس سے وہ اس کی موت واقع ہوگئی۔
16 مارچ 2025 کو واقعہ اُس وقت سامنے آیا جب پولیس کو ایک مرکزی سڑک کے قریب آدھی جلی ہوئی انسانی لاش کی اطلاع ملی۔ تحقیقات کے دوران حکام نے شبہ ظاہر کیا کہ مقتول کو قتل کیا گیا اور ثبوت چھپانے کیلیے لاش کو جلایا گیا۔
پولیس حکام کا یہ بھی کہنا تھا کہ لاش کی باقیات بوری میں ڈال کر سڑک پر پھینک دی گئیں، تحقیقات کیلیے ایک ٹیم تشکیل دی گئی جس نے گوپالی دیوی اور دیال کو گرفتار کیا۔
گزشتہ روز ریاست اتر پردیش کے شہر میرٹھ میں بیوی نے آشنا کے ساتھ مل کر شوہر کی لاش کے ٹکڑے ٹکڑے کیے اور اسے سیمنٹ سے بھرے ڈرم میں ڈال کر گھر میں چھپا دیا تاکہ کسی کو علم نہ ہو۔
