نیوزی لینڈ میں ایک جوڑے کو بس میں سفر کرنے سے منع کیا گیا تو انہوں نے ٹرانسپورٹ سروس کے 3 اہلکاروں پر تھوک دیا، پولیس نے جوڑے کی تلاش شروع کردی ہے۔
مذکورہ واقعہ نیوزی لینڈ کے شہر آکلینڈ میں گزشتہ روز پیش آیا، پولیس کا کہنا ہے کہ مذکورہ جوڑا ایک بس میں سفر کر رہا تھا تاہم ان کے سفر کی نوعیت جاننے کے بعد علم ہوا کہ وہ غیر ضروری طور پر سفر کر رہے تھے۔
بس سے اترنے کا کہنے پر جوڑا آپے سے باہر ہوگیا اور خاتون نے ٹرانسپورٹ سروس کے 3 اہلکاروں پر تھوک دیا جس کے بعد دونوں فرار ہوگئے۔
واقعے کا شکار افراد کو کرونا وائرس کے خدشے کے تحت فوری طور پر قرنطینہ منتقل کردیا گیا ہے۔
پولیس کا کہنا ہے کہ آج کل کے حالات کو دیکھتے ہوئے اس طرح کی حرکت پر وہ حیران ہیں اور وہ اسے بالکل برداشت نہیں کریں گے۔
حکام کے مطابق ٹرانسپورٹ سروس کا عملہ لوگوں کو سفری سہولیات مہیا کرنے کے لیے دن رات کام کر رہا ہے، ان کے ساتھ اس طرح کا سلوک بالکل برداشت نہیں کیا جائے گا۔
پولیس نے جوڑے کی تصویر جاری کر کے لوگوں سے ان کی معلومات فراہم کرنے کی اپیل کی ہے۔