ریاض: سعودی عرب میں عوامی مقام پر 2 سعودی خواتین سے ہاتھا پائی کرنے اور انہیں ہتھیار سے دھمکانے والے 3 افراد کو گرفتار کرلیا گیا۔
سعودی ویب سائٹ کے مطابق سعودی دارالحکومت ریاض میں 2 سعودی لڑکیوں کو ہتھیار کے بل پر دھمکانے اور مار پیٹ کرنے والے افراد کی ویڈیو سوشل میڈیا پر وائرل ہورہی ہے۔
وائرل ویڈیومیں دیکھا جاسکتا ہے کہ ایک عوامی ادارے کے سامنے خواتین جمع ہیں، نوک جھونک کے بعد ہاتھا پائی شروع ہوگئی۔
ریاض پولیس نے بتایا کہ سعودی لڑکیوں پر حملے میں شامل 3 افراد کو حراست میں لیا گیا ہے۔
ریاض پولیس کے ترجمان کا کہنا ہے کہ متاثرہ لڑکیوں نے شکایت درج کروائی تھی کہ ان پر 2 خواتین نے حملہ کیا جبکہ ایک شخص نے ہتھیار دکھا کر دھمکی دی اور پھر تینوں فرار ہوگئے۔
ترجمان کے مطابق تینوں افراد کو گرفتار کرلیا گیا ہے، ان میں سے 2 سعودی خواتین ہیں جبکہ ایک مرد ہے، تینوں کے خلاف پوچھ گچھ کی کارروائی مکمل کرلی گئی ہے۔
سوشل میڈیا کے صارفین نے واقعہ پر شدید برہمی کا اظہار کیا ہے۔
