صدر پاکستان آصف علی زرداری نے کہا ہے کہ خواتین کی معاشی خودمختاری سے خاندانوں کی خوشحالی اور ملکی ترقی میں مدد ملے گی۔
تفصیلات کے مطابق صدر مملکت سے اسٹینڈرڈ چارٹرڈ بینک کے گروپ چیف ایگزیکٹو بل ونٹرز نے وفد کے ہمراہ ملاقات کی اس موقع پر صدرمملکت نے کہا کہ خواتین کی معاشی خودمختاری کیلئے مالی خدمات اور قرضوں تک رسائی بہتر بنانا ہوگی۔
صدر پاکستان کا کہنا تھا کہ کاروباری خواتین کی حوصلہ افزائی اور بینکنگ شعبے میں خواتین کی نمائندگی کی ضرورت ہے۔
انھوں نے کہا کہ پاکستان نے ماحولیات کے تحفظ اور جنگلات کے فروغ کیلئے اقدامات کیے ہیں، حکومت سندھ نے مینگروز کے جنگلات لگائے، موسمیاتی شعبے میں سرمایہ کاری سے ماحولیات کے تحفظ میں مدد ملے گی۔
صدر مملکت نے کہا کہ امید ہے ایس سی بی ملک میں اپنے آپریشنز کو وسعت دیگا، ایس سی بی پاکستانی معیشت میں اہم کردار ادا کرتا رہے گا۔
آصف زرداری نے زرعی شعبے، بنیادی ڈھانچے بالخصوص چھوٹے ڈیمز، بیراج اور پاور پلانٹس میں سرمایہ کاری پر بھی زور دیا، انھوں نے کہا کہ بینک کسانوں کی زرعی ضروریات تک رسائی بڑھانے کیلئے مالیاتی خدمات اور قرضے فراہم کریں۔
صدرِ مملکت کی جانب سے بینک کو پاکستان میں کامیاب آپریشنز کے 160 سال مکمل ہونے پر مبارکباد دی، بینک نے ملک کے بینکنگ سیکٹر کے ارتقا میں قابل تعریف کردارادا کیا۔
