دنیا بھر کی طرح پاکستان میں بھی خواتین کا عالمی دن منایا جا رہا ہے، عالمی دن کی مناسبت سے کراچی ایئرپورٹ پر گراؤنڈ ہینڈلنگ سمیت تمام اہم اور مشکل امور خواتین عملے کے سپرد کر دیے گئے۔
اس اقدام کا مقصد خواتین کی اہمیت کو تسلیم کرنے کے ساتھ خراج تحسین پیش کرنا تھا، خواتین نے بین الاقوامی پرواز کی گراؤنڈ ہینڈلنگ سمیت پیچیدہ امور مہارت سے انجام دے کر ثابت کیا کہ وہ کسی سے کم نہیں ہیں۔
کراچی ایئر پورٹ پر بین الاقوامی پروازوں کی گراوٴنڈ ہینڈلنگ سمیت تمام مشکل امور خواتین نے سنبھال کر بتایا کہ بھاری بھر کم کام بھی وہ معمول کے مطابق کر سکتی ہیں۔ پرواز کی بریفنگ ہو یا چیک اِن کاؤنٹر سمیت تمام امور، خواتین نے پیشہ ورانہ مہارت کے ساتھ کام کر کے سب کو حیران بھی کر دیا۔
گروپ منیجنگ ڈائریکٹر اکرم ولی محمد نے بتایا کہ گراؤنڈ ہینڈلنگ کے لیے خواتین عملے کو نجی گراؤنڈ ہینڈلنگ کمپنی جیریز دناتا نے بھرتی کیا اور تربیت فراہم کی۔
واضح رہے کہ ملکی ترقی میں خواتین اب ہر فیلڈ میں اپنا بے مثال کردار ادا کر رہی ہیں۔
