انٹرنیشنل کرکٹ کونسل نے ویمنز ٹی 20 ورلڈکپ کیلئے پرائز منی کا اعلان کردیا، ایونٹ کیلئے انعامی رقم اس بار کہیں زیادہ رکھی گئی ہے۔
ویمنز ٹی 20 شوپیس ایونٹ کیلئے مجموعی انعامی رقم 7.95 ملین ڈالرز ہوگی جو کہ گزشتہ ایونٹ کے مقابلے میں 225 فیصد زیادہ ہے، ویمنز ٹی ٹوئنٹی ورلڈکپ جیتنے والی ٹیم کو 2.34 ملین ڈالرز کی انعامی رقم ملے گی۔
آئی سی سی کی جانب سے چند دنوں قبل ویمنز ٹی 20 ورلڈکپ کیلئے کم قیمت ٹکٹوں کا اعلان بھی کیا گیا تھا، ورلڈکپ میں کم از کم ٹکٹ 5 درہم کا ہو گا جبکہ 18سال سے کم عمر تماشائیوں کیلئے ٹورنامنٹ میں انٹری فری ہو گی۔
انٹرنیشنل کرکٹ کونسل (آئی سی سی) نے ویمنز ٹی 20 ورلڈ کپ کو بنگلہ دیش کی ابتر سیاسی صورتحال کے بعد متحدہ عرب امارات (یو اے ای) منتقل کردیا ہے۔
آئی سی سی کا کہنا ہے کہ بنگلہ دیش میں سیاسی صورتحال کی وجہ سے ایونٹ منتقل کیا گیا، ایونٹ کی میزبانی کے حقوق بنگلہ دیش کے پاس ہی رہیں گے، کچھ ملکوں کی ٹریول ایڈوائزری کی وجہ سے بنگلا دیش میں ایونٹ ممکن نہیں تھا۔
خیال رہے کہ 10 ٹیموں پر مشتمل خواتین ٹی 20 ٹورنامنٹ 3 سے 20 اکتوبر تک شارجہ اور دبئی میں کھیلا جائے گا۔ بھارت، آسٹریلیا، انگلینڈ اور نیوزی لینڈ نے حالیہ واقعات کی وجہ سے ٹریول ایڈوائزری جاری کی تھی۔
