حادثات میں زخمی ہونے والے اکثر افراد اسپتال پہنچنے سے قبل ہی زیادہ خون بہہ جانے کی وجہ سے جاں بحق ہوجاتے ہیں تاہم اب امریکی ماہرین نے تحقیق کے بعد ایسی سرنج تیار کی ہے جس کے ذریعے بہتے ہوئے خون کو فوری طور پر روکا جاسکتا ہے۔
ماہرین کے مطابق اس سرنج میں موجود ایکس اسٹیٹ اسپنچ موجود ہے جو گہرے زخم سے بہنے والے خون کو صرف 20 سیکنڈ کے اندر روکنے کی صلاحیت رکھتا ہے۔ اس سرنج کو خون والے حصے پر لگا نے سے اسپنچ خون سے ملتے ہی پھول کر اپنے اصل حجم سے 20 فیصد بڑے ہوکر خون کو روکنے میں کردار ادا کرتا ہے۔
زخم والے حصے پر لگانے سے سرنج میں موجود اسپنچ جسم کے اندر چلے جاتے ہیں، ذرات کو مریض کے جسم سے واپس باہر نکالنے کے لیے ان پر خاص نشان موجود ہیں جن کی ایکسرے میں آسانی سے نشاندہی ہوجاتی ہے۔
امریکی ماہرین نے گاڑیوں کے پنکچر کو ٹھیک کرنے کے لیے استعمال ہونے والے طریقے سے متاثر ہوکر یہ سرنج بنائی ہے، جس کے ذریعے خون بہنے کے عمل کو فوری طور روکا جاسکتا ہے مگر اس کا زخم صحیح ہونے سے کوئی تعلق نہیں۔
ابتدائی مرحلے میں اس سرنج کو خاص طور پر جنگ میں حصہ لینے والے فوجیوں کے لیے تیار کیا گیا تھا تاکہ گولی لگنے کی صورت میں بہتے ہوئے خون کو فوری طور پر روک کر جان بچائی جاسکے تاہم اب یہ عام افراد کے استعمال کے لیے مارکیٹ میں ’’ایکس اسٹیٹ تھرٹی‘‘ کے نام سے دستیاب ہے۔
واضح رہے کہ امریکی ادارے ایف ڈی اے نے بھی اس کے کارآمد ہونے کی تصدیق کردی ہے۔
