وائر لیس چارجرز آج کل عام ہوتے جارہے ہیں، حال ہی میں ایک ڈیزائنر انجینیئر نے لکڑی سے بنا ہوا وائر لیس چارجر تیار کرلیا۔
بین الاقوامی ویب سائٹ کے مطابق لیٹویا کے فنکار انجینیئر نے روایتی وائر لیس چارجر کو ایک خوبصورت روپ دیا ہے، انہوں نےوائرلیس چارجر کا پورا سرکٹ دو درختوں کی لکڑی میں سمو دیا ہے۔
دلچسپ بات یہ ہے کہ لکڑی کا یہ چارجنگ اسٹیشن موبائل فون کے لیے ایک اسٹیںڈ کے طور پر بھی استعمال کیا جاسکتا ہے اور میز پر رکھے فون کو دور سے ہی دیکھا جاسکتا ہے۔
اس کی سب سے اہم خاصیت یہ ہے کہ چارجر کے ایک مقام پر دس لاکھ کے قریب باریک سکشن کپ لگائے گئے ہیں جہاں سے فون چپک کر اس سے جڑ جاتا ہے، اب اس کی پشت پر موجود کوائل فون کو وائر لیس چارجنگ فراہم کرتی ہے اور وہ بہت تیزی سے برقی رو اپنی بیٹری میں بھرنے لگتا ہے۔
لکڑی سے بنا چارجر آپ کی میز پر ایک طرح کا قدرتی تاثر فراہم کرتا ہے، اس کے دو پہلو پر جارچنگ کی جاسکتی ہے اور یوں فون کو 30 اور 40 درجے زاویے پر رکھا جاسکتا ہے۔
اس طرح چارجنگ کے دوران آپ فون کو آسانی سے دیکھ سکتے ہیں۔
اس میں نصب مائیکرو یو ایس بی کیبل مقناطیسی نوعیت کی ہے جس کی بدولت چارجنگ کا عمل آسان ہوجاتا ہے، اس میں نصب ایل ای ڈی جارچنگ کی صورتحال بھی ظاہر کرتی رہتی ہے۔
لیٹویا کی یہ ایجاد ہر قسم کے چارجنگ فون کے لیے کارآمد ہے، لکڑی سے تراشا ہوا یہ اہم وائر لیس چارجر 75 ڈالر میں خریدا جا سکتا ہے۔
