اسلام آباد: ذرائع نے بتایا ہے کہ عالمی بینک نے پاکستان کیلئے 20 ارب ڈالرز دینے کا وعدہ کیا ہے، 19 ڈائریکٹرز نے پاکستان کے حق میں ووٹ دیا۔
تفصیلات کے مطابق ذرائع نے انکشاف کیا کہ 10 سالہ کنٹری پارٹنر شپ فریم ورک کے تحت ورلڈ بینک کی جانب سے 20 ارب ڈالرز دینے کا وعدہ کیا گیا ہے، فریم ورک کی منظوری کیلئے 24 میں سے 19 ڈائریکٹرز نے پاکستان کے حق میں ووٹ دیا۔
ذرائع نے بتایا کہ عالمی بینک 20 ارب ڈالرز کا تقریباً 3 چوتھائی حصہ آئی ڈی اے کے ذریعے فراہم کرے گا، بقیہ رقم انٹرنیشنل بینک فار ری کنسٹرکشن اینڈ ڈویلپمنٹ کے تحت فراہم کی جائے گی۔
توسیعی فریم ورک 6 کلیدی ترقیاتی شعبوں پر توجہ مرکوز کرےگا، انٹرنیشنل فنانس کارپوریشن کی طرف سے اضافی فنڈنگ سے سی پی ایف کی تکمیل ہوگی۔
ذرائع نے بتایا کہ سی پی ایف کا مقصد چائلڈ اسٹننگ کو کم کرنا، موسمیاتی تبدیلی کی روک تھام ہے، مقصد صاف پانی کی فراہمی، عوامی وسائل،پرائیویٹ سرمایہ کاری کو بڑھانا ہے، مخصوص اہداف میں ٹیکس ریونیو کو جی ڈی پی کے 15 فیصد سے زائد کرناشامل ہے۔
قابل تجدید توانائی کی صلاحیت میں 10 گیگا واٹ کا اضافہ بھی شامل ہے، 12 ملین طلبا کو معیاری تعلیم اور 50 ملین افراد کو صحت کی سہولیات فراہم کرنا شامل ہے۔
ذرائع نے بتایا کہ سی پی ایف میں 60 ملین افراد کو صاف پانی اور صفائی کی سہولیات کی فراہمی بھی شامل ہے، 30 ملین افراد کے لئے غذائی تحفظ کو مضبوط بنانا اہداف میں شامل ہے۔
اس حوالے سے ذرائع کا مزید کہنا تھا کہ 30 ملین خواتین تک مانع حمل کی رسائی کو بڑھانے جیسے اہداف شامل ہیں، اس کے علاوہ سیلاب، دیگر آفات سے نمٹنے کیلئے اہداف مقرر کیے گئے ہیں، 75 ملین افراد مستفید ہوں گے۔
