ڈبلیو بی او یوتھ ورلڈ چیمپئن عثمان وزیر نے اپنی دسویں انٹرنیشنل فائٹ کا اعلان کردیا۔
اے آر وائی نیوز کے مطابق ڈبلیو بی او یوتھ ورلڈ چیمپئن عثمان وزیر ورلڈ ٹائٹل کا دفاع کرنے کے لیے تیار ہیں، قومی باکسر نے اپنی دسویں انٹرنیشنل فائٹ کا اعلان کردیا ہے۔
گلگت سے تعلق رکھنے والے قومی اسٹار باکسر 4 فروری کو دبئی میں ٹائٹل کا دفاع کریں گے۔
عثمان وزیر کا مقابلہ تھائی لینڈ کے باکسر کرونگ کلنگ سے ہوگا، قومی باکسر نے کامیابی کے لیے قوم سے دعاؤں کی اپیل کی ہے۔
واضح رہے کہ گزشتہ سال ستمبر میں قومی باکسر عثمان وزیر ڈبلیو بی او ورلڈ یوتھ ٹائٹل کے چیمپئن بنے تھے۔
انہوں نے تھائی لینڈ میں کھیلی جارہے ڈبلیو بی او ورلڈ یوتھ کے فائنل میں تھائی حریف سیسا کو پچھاڑا تھا، پاکستان باکسر نے حریف باکسر کو چھٹے راؤنڈ میں ناک آؤٹ کرتے ہوئے ٹائٹل اپنے نام کیا تھا۔
یاد رہے کہ یہ پہلا موقع تھا کہ جب کسی پاکستانی باکسر نے ورلڈ یوتھ ٹائٹل اپنے نام کیا۔
