دھرم شالا:بھارت میں ہونے والے ون ڈے ورلڈکپ کے تیسرے میچ میں بنگلادیش نے افغانستان کو باآسانی 6 وکٹوں سے ہرادیا۔
بنگال ٹائیگرز نے157رنزکا ہدف 35ویں اوور میں حاصل کرلیا، بنگلادیش کے نجم الحسین شنٹو 59 رنز کی ناقابل شکست اننگز کھیل کرنمایاں رہے، جبکہ افغانستان کے عظمت اللہ، فضل فاروقی اور نوین الحق نے ایک ایک وکٹ لی۔
افغانستان کی ٹیم پہلے کھیل کر صرف 156 رنز پر ڈھیر ہوگئی تھی، بنگلادیشی کپتان شکیب الحسن اور مہدی حسن نے 3 3 وکٹیں حاصل کیں، اس کے علاوہ شرف الاسلام نے 2 اور تسکین احمد، مستفیظ الرحمان نے ایک ایک وکٹ لی۔
دوسری جانب رحمان اللہ گرباز 47 رنز بنا کر نمایاں رہے، عظمت اللہ اور ابراہیم زدران نے 22، 22 رنز بنائے جبکہ رحمت شاہ اور کپتان حشمت اللہ 18،18 رنز بنا سکے۔
بھارت کی میزبانی میں ہونے والے آئی سی سی ورلڈ کپ کا تیسرا میچ ریاست ہماچل پردیش کے شہر دھرمشالا کے ہماچل پردیش کرکٹ ایسوسی ایشن اسٹیڈیم میں کھیلا گیا جہاں بنگلادیش اور افغانستان مدمقابل تھے، بنگلادیش نے افغانستان کیخلاف ٹاس جیت کرفیلڈنگ کا فیصلہ کیا تھا۔
واضح رہے کہ پاکستان نے ون ڈے ورلڈکپ کے پہلے میچ میں نیدرلینڈز کو 81 رنز سے شکست دے کر ایونٹ میں فاتحانہ آغاز کیا ہے۔
