ون ڈے ورلڈ کپ 2023 کے 13 ویں میچ میں افغانستان نے دفاعی چیمپئن انگلینڈ کے خلاف شاندار آغاز کیا تاہم ٹیم کی سنچری مکمل ہوتے ہی لگاتار یکے بعد دیگر وکٹیں گر گئیں۔
اے آر وائی نیوز کے مطابق بھارت میں کھیلے جا رہے کرکٹ کے سب سے بڑے عالمی میلے آئی سی سی ون ڈے ورلڈ کپ کا آج 13 واں میچ کھیلا جا رہا ہے۔ دہلی کے فیروز شاہ کوٹلہ اسٹیڈیم میں دفاعی چیمپئن انگلینڈ نے افغانستان کے خلاف ٹاس جیت کر پہلے فیلڈنگ کا فیصلہ کیا ہے جو ابتدا میں غلط ثابت ہوا۔
افغانستان کی جانب سے رحمت اللہ گرباز اور ابراہیم زردان نے اننگ کا آغاز کیا اور بغیر کوئی وکٹ کھوئے ساتویں اوور میں ٹیم کی نصف سنچری مکمل اور پندرھویں اوور میں سنچری مکمل کرائی۔
انگلینڈ کو پہلی کامیابی زردان کی صورت میں ملی جب وہ عادل رشید کی گیند پر جو روٹ کا کیچ بن گئے۔ انہوں نے 28 رنز بنائے۔ اس وقت افغانستان کا مجموعی اسکور 114 رنز تھا۔ نئے آنے والے بلے بھی اگلے اوور میں عادل رشید اور وکٹ کیپر بٹلر کے گٹھ جوڑ کا نشانہ بن گئے اور اسٹمپ ہوکر 3 رنز پر پویلین لوٹ گئے۔
اسی اوور میں اگلی گیند پر افغان ٹیم پر کاری وار ہوا جب نئے آنے والے بیٹر کپتان حشمت اللہ کی کال پر رحمت اللہ گرباز رنز کے لیے دوڑے لیکن ان سے قبل فیلڈر نے چابک دستی سے گیند وکٹ کیپر کے ہاتھوں میں پہنچا دی۔
رحمت اللہ گرباز نے جارحانہ بیٹنگ کا مظاہر کرتے ہوئے صرف 57 گیندوں پر 80 رنز بنائے جس میں 4 چھکے اور 8 چوکے شامل ہیں۔
اس وقت کریز پر کپتان حشمت اللہ شاہدی کے ساتھ عظمت اللہ عمر زئی موجود ہیں اور افغان ٹیم کا مجموعی اسکور 20 اوورز میں تین وکٹوں پر 125 رنز ہے۔
آج کے میچ کے لیے انگلینڈ کی ٹیم میں کوئی تبدیلی نہیں کی گئی ہے جب کہ افغانستان نے نجیب اللہ زردان کی جگہ اکرام علی خیل کو پلیئنگ الیون میں شامل کیا ہے۔
اس سے قبل ٹاس جیت کر انگلش کپتان جوز بٹلر نے کہا کہ کوشش ہے کہ اپنے کھیل میں بہتری لاتے رہیں۔ افغان ٹیم اچھی ہے اسے کم سے کم اسکور پر محدود کرنے کی کوشش کریں گے۔
افغان کپتان حشمت اللہ شاہدی نے کہا کہ ہم بھی ٹاس جیت کر پہلے فیلڈنگ کرنا چاہتے تھے۔ پچ بیٹنگ کیلیے سازگار لگ رہی ہے اور 300 رنز اس پچ پر اچھا اسکور ہوگا۔
آج کے میچ کے لیے دونوں ٹیمیں ان کھلاڑیوں پر مشتمل ہیں۔
انگلینڈ:
جوز بٹلر (کپتان)، جونی برسٹو، جو روٹ، ہیری بروکس، لیام لیونگ اسٹون، کرس ووکس، سام کورن، عادل رشید، مارک ووڈ، ریسے ٹاپلی۔
افغانستان:
حشمت اللہ شاہدی (کپتان)، ابراہیم زردان، رحمت شاہ، رحمت گرباز، محمد نبی، اکرم علی خیل، عظمت اللہ عمر زئی، راشد خان، مجیب الرحمان، نوین الحق، فضل حق فاروقی۔
دفاعی چیمپئن نے رواں میگا ایونٹ میں دو میچز کھیلے ہیں جن میں ایک میں فتح اور ایک میں شکست ہوئی ہے اور وہ دو پوائنٹ کے ساتھ پانچویں نمبر پر ہے جب کہ افغانستان نے بھی دو میچ کھیلے اور دونوں ہار کر پوائنٹ ٹیبل پر سب سے آخر میں دسویں نمبر پر موجود ہے۔
پوائنٹ ٹیبل کے مطابق بھارت اور نیوزی لینڈ نے اپنے تینوں میچز جیت کر چھ 6 پوائنٹ حاصل کر رکھے ہیں تاہم رن ریٹ کی بنیاد پر میزبان ٹیم پہلے اور کیویز دوسرے نمبر پر ہیں۔ جنوبی افریقہ نے دو میچز کھیلے ہیں اور فتح یاب ہوکر 4 پوائنٹ کے ساتھ تیسرے جب کہ پاکستان دو میں سے ایک میچ ہارنے کے بعد 4 پوائنٹ کے ساتھ چوتھے نمبر پر ہے۔
