بھارت میں منعقد ہونے والے ورلڈکپ کے حوالے سے پاکستانی شائقین کا جوش و خروش بھی عروج پر ہے اور بہت سے مداح پڑوسی ملک کے اسٹیڈیم میں بیٹھ کر میچ دیکھنے کے خواہشمند ہیں۔
تاہم ابھی تک بھارتی حکام کی جانب سے پاکستانی شائقین کے لیے ویزوں کا اجرا نہیں کیا گیا۔ نگراں وزیر خارجہ جلیل عباسی جیلانی کا کہنا ہے کہ پاکستانی شائقین کرکٹ کو ورلڈکپ 2023 کے لیے ویزے جاری نہ ہونے پر انٹرنیشنل کرکٹ کونسل سے بات کریں گے۔
جلیل عباسی جیلانی کا وزارت خارجہ میں پریس کانفرنس کے دوران کہنا تھا کہ آئی سی سی رولز کے مطابق یہ لازمی ہے کہ پاکستانی شائقین کرکٹ کو ویزے دیے جائیں۔ ملکی شائقین کو ورلڈکپ دیکھنے کے لیے ویزے ملنے چاہئیں۔
پاکستانی مداحوں کو تاحال بھارتی ویزے نہ ملنے پر انھوں نے پرزور انداز میں کہا کہ پاکستانی فینز کے ویزا دلوانے کے لیے آئی سی سی کے سامنے معاملے اُٹھائیں گے۔
گزشتہ دنوں بھارتی سیکیورٹی اہلکاروں نے پاکستان کرکٹ ٹیم کے استقبال کے لیے ایئرپورٹ آنے والے چاچا بشیر کو پاکستانی پرچم لہرانے سے روک دیا تھا۔
واضح رہے کہ میگا ایونٹ کے آغاز میں محض چند دن ہی رہ گئے ہیں اور بھارت میں دیگر ممالک سے شائقین کی آمد کا سلسلہ بھی شروع ہوچکا ہے۔
