ٹی ٹوئنٹی ورلڈ کپ کے میلبرن میں کھیلے جا رہے فائنل میں پاکستان نے انگلینڈ کو جیتنے کے لیے 138 رنز کا ہدف دیا ہے۔
انگلینڈ نے ٹاس جیت کر پہلے فیلڈنگ کا فیصلہ کیا، پاکستان نے مقررہ 20 اوورز میں 8 وکٹوں کے نقصان پر 137 رنز بنائے، پاکستان کی جانب سے کوئی بھی بلے باز نصف سنچری نہ بنا سکا اور نہ کوئی بڑی پارٹنر شپ قائم ہوئی، شان مسعود 38 رنز بنا کر ٹاپ اسکورر رہے۔
پاکستان کو پہلا نقصان محمد رضوان کی صورت میں اٹھانا پڑا جب وہ 29 کے مجموعے پر 15 رنز بنا کر کورن کی گیند پر بولڈ ہوگئے، محمد حارث 45 کے مجموعے پر ٹیم کا ساتھ چھوڑ گئے، انہوں نے 8 رنز بنا کر عادل رشید کی گیند پر اسٹوکس کو کیچ دے دیا۔
پاکستان ٹیم کی نصف سنچری 8 اوورز میں مکمل ہوئی، مجموعی اسکور 84 رنز پر پہنچا تو کپتان بابر اعظم کا شاندار کیچ عادل رشید نے اپنی ہی گیند پر پکڑ کر انہیں قابو کیا، بابر نے 32 رنز بنائے، اگلے ہی اوور میں پاکستان کو چوتھا نقصان امیدوں کا محور افتخار احمد کی صورت میں اٹھانا پڑا وہ بغیر کوئی رن بنائے بین اسٹوکس کو وکٹ دے بیٹھے۔
پاکستان کو 121 کے مجموعے پر پانچواں نقصان اٹھانا پڑا جب بائیں ہاتھ کے بلے باز شان مسعود 38 رنز بنا کر کورن کی دوسری وکٹ بنے، اگلے اوور میں جارڈن نے نائب کپتان شاداب خان کو 20 رنز کے انفرادی اسکور پر چلتا کیا، ان کا کیچ ووکس نے تھاما، محمد نواز صرف پانچ رنز کے مہمان ثابت ہوئے اس بار بھی کامیاب بولر سیم کورن تھے۔
شاہین آفریدی پانچ اور حارث رؤف ایک رنز بنا کر ناٹ آؤٹ رہے۔
انگلینڈ کی جانب سے سیم کورن سب سے کامیاب بولر رہے جنہوں نے صرف 12 رنز دے کر 3 وکٹیں حاصل کیں جس میں شان مسعود اور محمد رضوان کی قیمتی وکٹیں بھی شامل تھیں۔ عادل رشید نے 22 اور کرس جورڈن نے 27 رنز دے کر دو دو وکٹیں حاصل کیں، ووکس نے 32 رنز دے کر ایک کھلاڑی آؤٹ کیا۔
فائنل میچ کے لیے دونوں ٹیموں نے کوئی تبدیلی نہیں کی ہے اور اپنے سیمی فائنلز کے فاتح اسکواڈز کو برقرار رکھا ہے۔
