نیویارک: اقوام متحدہ نے دنیا کے سب سے زیادہ خوش رہنے والے ممالک کے شہریوں کی فہرست کردی جس میں پاکستان نے بھارتیوں کو بہت پیچھے چھوڑ دیا۔
تفصیلات کے مطابق اقوامِ متحدہ کی جانب سے دنیا کے خوش رہنے والے ممالک کی فہرست جاری کی گئی جس میں فن لینڈ نے ایک بار پھر مقابلہ اپنے نام کیا، گزشتہ برس بھی فن لینڈ کے شہری دنیا بھر میں سب سے زیادہ خوش اور مطمئن رہنے قرار پائے تھے۔
اقوام متحدہ کی فہرست کو دیکھ کر اندازہ لگایا جاسکتا ہے کہ خوش اور مطمئن رہنے میں پاکستانی قوم نے بھارتیوں کو پیچھے چھوڑ دیا کیونکہ انڈیکس میں پاکستان 67ویں اور بھارت 140ویں نمبر پر ہے۔ رپورٹ میں بتایا گیا ہے کہ گزشتہ انڈیکس میں پاکستان کا نمبر 87 واں تھا تاہم اس میں 20 درجے ترقی ہوئی۔
رپورٹ کے مطابق فہرست میں پہلی دس پوزیشنز حاصل کرنے والے ممالک میں فِن لینڈ پہلے، ڈنمارک دوسرے، ناروے تیسرے، آئس لینڈ چوتھے، نیدرلینڈز پانچویں، سوئٹزرلینڈ چھٹے، سوئیڈن ساتویں، نیوزی لینڈ آٹھویں، کینیڈانویں اور آسٹریا نے دسواں نمبر حاصل کیا۔
رپورٹ میں انکشاف کیا گیا ہے کہ منشیات کی بڑھتی ہوئی عادت کی وجہ سے پچھلے سال کی نسبت امریکا کی ایک درجہ تنزلی ہوئی جس کے بعد وہ انیسویں نمبر پر پہنچ گیا۔ فہرست میں جنوبی سوڈان سب سے آخری 156 واں نمبر حاصل کرسکا۔
اقوام متحدہ کی جانب سے واضح کیا گیا ہے کہ رپورٹ مرتب کرتے وقت مختلف باتوں کو مدنظر رکھا جاتا ہے، جن میں عوام کا حکومت پر اعتماد، سرکار کی طرف سے ملنے والی سہولیات، جدید ٹیکنالوجی کی سہولیات وغیرہ شامل ہیں۔
جنوبی ایشیا کے خطے کی بات کی جائے تو پاکستان سرفہرست جبکہ دوسرے پر بھوٹان، تیسرے پر نیپال، بنگلہ دیش چوتھے، سری لنکا پانچویں، بھارت چھٹے اور سب سے آخری میں افغانستان ہے۔
