جنیوا: عالمی ادارہ صحت (ڈبلیو ایچ او) کا کہنا ہے کہ کرونا وائرس کے ساتھ پروپیگنڈے کا بھی مقابلہ کررہے ہیں۔
غیرملکی خبررساں ادارے کی رپورٹ کے مطابق عالمی ادارہ صحت کا کہنا ہے کہ کرونا سے متعلق غلط معلومات اور افواہیں مشکلات پیدا کررہی ہیں، سازشی نظریات کرونا پر قابو پانے کے عمل کو نقصان پہنچا رہی ہیں۔
ڈبلیو ایچ او کے مطابق لوگوں کو صحت کے لیے درست معلومات تک رسائی ملنی چاہئے، کرونا وائرس سے متعلق غلط معلومات خوف کا سبب بنتی ہیں۔
واضح رہے کہ 31 جنوری کو عالمی ادارہ صحت نے چین سے دنیا بھر میں پھیلنے والے کرونا وائرس پر عالمی ہیلتھ ایمرجنسی کا اعلان کیا تھا۔
مزید پڑھیں: جان لیوا کرونا وائرس سے ہلاکتوں کی تعداد 910 تک جا پہنچی
ڈی جی ڈبلیو ایچ او ڈاکٹر ٹیڈروس ایڈھانم نے کہا تھا کہ ایمرجنسی کا مقصد صورت حال سے نمٹنے کے لیے اقدامات کو تیز کرنا ہے، چین پر تجارتی یا سفری پابندیوں کی سفارش نہیں کر رہے۔
یاد رہے کہ چین میں اب تک جان لیوا وائرس سے ہلاک افراد کی تعداد 910 ہو چکی ہے، جب کہ وائرس سے متاثرہ افراد کی تعداد 40 ہزار تک جا پہنچی ہے۔
خیال رہے کہ برطانیہ میں کرونا وائرس کا ایک اور کیس سامنے آیا ہے جس کے بعد برطانیہ میں مریضوں کی تعداد 4 ہوگئی ہے۔
