اسلام آباد: پاکستان میں کرپٹو کرنسی کے حوالے سے بڑی پیش رفت ہوئی ہے، پاکستان کرپٹو کونسل اور ورلڈ لبرٹی فنانشل کے درمیان اہم معاہدہ طے ہوا ہے۔
تفصیلات کے مطابق ورلڈ لبرٹی فنانشل نے پاکستان کرپٹو کونسل کے ساتھ شراکت کی ہے، ورلڈ لبرٹی فنانشل امریکی صدر ڈونلڈ ٹرمپ کا حمایت یافتہ ڈی سینٹرلائزڈ فنانس پلیٹ فارم ہے۔
ورلڈ لبرٹی فنانشل پاکستان میں بلاک چین کی جدت کو تیز تر بنانے، پائیدار کوائن کے استعمال اور ڈی سینٹرلائزڈ فنانس کو فروغ دینے میں مدد فراہم کرے گی، اس معاہدے کی دستاویز پر پاکستان کرپٹو کونسل کے سی ای او بلال بن ثاقب اور ورلڈ لبرٹی فنانشل کی ٹیم نے دستخط کیے۔
تقریب میں وزیر خزانہ، گورنر اسٹیٹ بینک، چیئرمین ایس ای سی پی اور آئی ٹی کے وفاقی سیکریٹری بھی شریک تھے، ورلڈ لبرٹی فنانشل کے وفد میں زیکری فولک مین، زیکری وٹکوف اور چیزہیرو شامل تھے۔ وفد نے وزیر اعظم شہباز شریف، آرمی چیف، ڈپٹی وزیر اعظم، وزیر اطلاعات اور وزیر دفاع سے ملاقاتیں کیں، اور شراکت داری کو باضابطہ شکل دی۔
پاکستانی کرنسی کے مقابلے میں سعودی ریال کی قدر میں کمی
اشتراک کی دستاویز پر دستخطوں کے موقع پر وزیر خزانہ محمد اورنگزیب نے کہا پاکستان کے نوجوان اور ٹیکنالوجی سیکٹر ہماری سب سے بڑی طاقت ہیں، ایسی شراکت داریاں سرمایہ کاری، جدت اور بلاک چین معیشت میں عالمی قیادت کے نئے مواقع فراہم کریں گی۔
پاکستان کرپٹو کونسل کے سی ای او بلال بن ثاقب نے کہا ورلڈ لبرٹی فنانشل سے ہمارا تعاون صرف معاہدہ نہیں بلکہ ایک حکمت عملی ہے، ہمارا مقصد نوجوان آبادی کو بااختیار بنانا اور پاکستان کو بین الاقوامی مالیاتی مستقبل سے جوڑنا ہے۔
کرپٹو کرنسی کو قانونی شکل دینا ضروری ہے، بلال بن ثاقب
ورلڈ لبرٹی فنانشل کی قیادت نے کہا پاکستان کی توانائی، وژن اور صلاحیت اسے دنیا میں ڈی سینٹرلائزڈ فنانس کے مستقبل کی تعمیر کے لیے ایک بہترین مقام بناتے ہیں۔ واضح رہے کہ ورلڈ لبرٹی فنانشل کو صدر ٹرمپ اور ان کے بیٹے ایرک ٹرمپ، ڈونلڈ ٹرمپ جونیئر اور بیرن ٹرمپ کی حمایت حاصل ہے۔
ڈونلڈ ٹرمپ نے ستمبر 2024 میں ایک ٹویٹ میں ورلڈ لبرٹی پلیٹ فارم کے آغاز کو تاریخی لمحہ قرار دیا تھا، ورلڈ لبرٹی فنانشل کا مقصد بلاک چین کے ذریعے عالمی مالیاتی نظام میں انقلاب لانا ہے۔ مستقبل میں پاکستان تیزی سے ترقی کرنے والی کرپٹو کرنسی کی مارکیٹوں میں سے ایک کے طور پر ابھرے گا۔ رقوم کی ترسیل اور تجارت کے لیے اسٹیبل کوائنز کا استعمال بڑھایا جائے گا۔ اس وقت ملک میں 2.5 کروڑ فعال کرپٹو صارفین موجود ہیں، جب کہ سالانہ تقریباً 300 ارب ڈالر کی کرپٹو لین دین ہو رہی ہے۔
