لارڈز: آئی سی سی ورلڈ ٹیسٹ چیمپئن شپ فائنل، پہلے دن کا کھیل ختم ہوگیا، دن کے اختتام تک مجموعی طور پر 14 وکٹیں گر گئیں۔
تفصیلات کے مطابق ڈبلیو ٹی سی فائنل میں آسٹریلیا کی پہلی اننگز کے جواب میں جنوبی افریقا نے اپنی پہلی اننگز میں 4 وکٹوں کے نقصان پر 43 رنز بنالیے، پروٹیز کو کینگروز کی برتری ختم کرنے کیلئے 169 رنز مزید درکار ہیں۔
جنوبی افریقہ کے کپتان ٹیمبا باووما 3 اور ڈیوڈ بیڈنگھم 8 رنز بناکر کریز پر موجود ہیں، آسٹریلیا کی طرف سے مچل اسٹارک نے 2 جبکہ پیٹ کمنز اور جوش ہیزل ووڈ نے 1، 1 وکٹ حاصل کی ہے۔
اس سے قبل ورلڈ ٹیسٹ چیمپئن شپ فائنل میں کاگیسور ربادا کی تباہ کن بولنگ کے سامنے آسٹریلیا کی ٹیم پہلی اننگز میں 212 پر آل آؤٹ ہوگئی۔
لارڈز کے تاریخی گرائونڈ میں کھیلے جانے والے ڈبلیو ٹی سی فائنل کے پہلے دن جنوبی افریقہ نے ٹاس جیت کر آسٹریلیا کو پہلے کھیلنے کی دعوت دی، تاہم کینگرو بیٹرز شروع سے ہی دباؤ میں نظر آئے، اوپنر عثمان خواجہ 20 بالز کھیلنے کے باوجود کوئی رنز بنائے بغیر پویلین لوٹے۔
محض 17 کے اسکور پر مارنس لیبوشین بھی آئوٹ ہوگئے، ایک مرحلے پر 67 رنز پر آسٹریلیا کی 4 وکٹیں گرچکی تھیں، تاہم ایسے میں اسٹیو اسمتھ اور بیو ویبسٹر نے ہمت دکھاتے ہوئے بالترتیب 66 اور 72 رنز کی اننگز کھیل کر اپنی ٹیم کو سنبھالا۔
ان دنوں کے علاوہ کے علاوہ وکٹ کیپر ایلکس کیری 23 رنز بنا کر نمایا رہے جبکہ ایکسٹراز کی مڈ میں آسٹریلیا کو 17 قیمتی رنز ملے۔
جنوبی افریقی پیسر کاگیسو ربادا نے فائنل کی پہلی اننگز میں شاندار بولنگ کی اور 51 رنز دے کر 5 کینگرو بیٹر کو چلتا کیا، ان کی عمدہ بولنگ پر آسٹریلین بیٹر مشکلات کا شکار نظر آئے۔
مارکو جانسین نے 49 رنز دے کر 3 وکٹیں حاصل کیں، جبکہ کیشو مہاراج اور ایڈن مارکرم کے حصے میں ایک، ایک وکٹ آئی۔
