لندن : گنیز بک آف ورلڈ ریکارڈ میں جگہ بنانے والا دنیا کا سب سے بڑ اخرگوش مالکن کے گھر سے چوری ہوگیا۔ چار فٹ لمبا خرگوش ہفتہ کی رات سے لاپتہ ہے۔
غیر ملکی خبر رساں ادارے کے مطابق ایوارڈ یافتہ (ڈیریئس ) خرگوش اپنی مالکن کے گھر سے دو دن قبل لاپتہ ہوا جس کی تلاش میں پولیس بھی اپنی کوششیں جاری رکھے ہوئے ہے۔
میڈیا رپورٹس کے مطابق خرگوش کی مالکن اینیٹے ایڈورڈز کا کہنا ہے کہ اس کے لیے یہ نہایت افسوس کا دن ہے۔خرگوش کی گمشدگی سے علاقہ پولیس کو بھی آگاہ کردیا گیا ہے۔
ڈیریئس نام کے خرگوش کی مالکن اینیٹے ایڈورڈز نے اعلان کیا ہے کہ ان کے چوری یا لاپتہ ہونے والے خرگوش کو واپس لانے والے شخص کو ایک ہزار برطانوی پاؤنڈز انعام کے طور پر دیے جائیں گے۔
یاد رہے کہ سال2010میں گینز بک آف ورلڈ ریکارڈ نے چار فٹ دو انچ لمبا ہونے پر اسے دنیا کا سب سے طویل خرگوش قرار دیا تھا۔
مقامی پولیس کے مطابق بظاہر ایسا لگتا ہے کہ خرگوش کو باغ کی چار دیواری سے چوری کیا گیا ہے جو مالکن کے گھر میں ہے۔
مزید دلچسپ بات ہے کہ اپریل2017 میں اس خرگوش کی شادی کا بھی اہتمام کیا گیا تھا۔ ایسٹر کے موقع پر ڈیریئس کی شادی ہنی نامی خرگوشنی سے کی گئی تھی جو تین فٹ گیارہ انچ لمبی تھی۔ ہنی نامی خرگوشنی کو دنیا کی سب سے طویل خرگوشنی قرار دیا گیا تھا۔
