دبئی: متحدہ عرب امارات کے شہر دبئی میں دنیا کا سب سے بڑا فائر انجن بنا لیا گیا جس کی تصاویر سامنے آگئیں۔
خلیج ٹائمز کی رپورٹ کے مطابق متحدہ عرب امارات کے شہر دبئی میں رواں ہفتے دنیا کا سب سے بڑا فائر انجن بنایا گیا ہے جس کا سائز 8 بائی 8 کا ہے، فائر انجن امارات کی مقامی کمپنی نے بنایا ہے۔
فائر انجن نیشنل فائر فائٹنگ مینوفیکچرنگ (نیفکو) کی جانب سے بنایا گیا ہے، فائر انجن کو ایئرپورٹ پر آگ بھڑکنے کی صورت میں استعمال میں لایا جائے گا۔
جدید ترین فائر انجن میں 18000 لیٹر پانی لے جانے کی صلاحیت ہے اور اس میں آگ بجھانے کے متعدد اوزار رکھے جاسکتے ہیں۔
فائر انجن کو سیاہ رنگ کیا گیا ہے جبکہ اس کے سائیڈ پر ایک پیلے رنگ کی پٹی لگائی گئی ہے، اس فائر انجن میں دو انجن موجود ہیں جو 1400 سے زیادہ ہارس پاور تیار کرتے ہیں، اس کی رفتار ہنگامی گاڑی کی رفتار سے تیز ہے۔
نمائش میں انکشاف کردہ فالکن 8 بائی 8 ایک ماڈل تھا، جس میں دیگر گاڑیاں ابھی باقی ہیں، نافکو نے دبئی انٹرسیک میں اپنی ہائی ٹیک فورڈ ریسکیو گاڑیاں اور ایمبولینسوں کی نمائش بھی کی۔
