کیلیفورنیا: آپ کو یہ جان کر یقیناً حیرت ہوگی کہ دنیا میں ایک ایسا پیراسائٹ بھی موجود ہے جو زبان خور ہے، اور یہ زندہ مچھلی کی زبان کھا کر زندہ رہتا ہے۔
اے آروائی نیوز براہِ راست دیکھیں live.arynews.tv پر
اس طفیلیے یعنی پیراسائٹ کا حیاتیاتی نام سائموتھاؤ ایگزگوا (cymothoa exigua) ہے، یہ زبان کھانے والا کیڑا ہے جو مچھلیوں کے منہ میں جا کر ان کی زبان کاٹ ڈالتا ہے اور اس کے بعد خود مچھلی کی زبان کا حصہ بن جاتا ہے۔
یہ مچھلیوں کی زبان سے چپک کر خون کی روانی روک دیتا ہے اور اسے گرنے پر مجبور کر دیتا ہے، یہ ابتدائی عمر سے ہی منہ میں جا بیٹھتا ہے اور بلوغت تک اپنی جنس بدلتا رہتا ہے۔
یہ پیراسائٹ اپنی مضبوط ٹانگوں سے زبان پر چپکا رہتا ہے اور اس دوران مچھلی کی زبان کاٹ کر لہو چوس کر زندہ رہتا ہے، لیکن آپ کو یہ جان کر حیرت ہوگی کہ زبان گرانے کے بعد یہ خود کو مصنوعی زبان کےطور پر پیش کرتا ہے۔
زبان گر جانے سے مچھلی مرتی نہیں ہے اور منہ میں کیڑے کی مستقل موجودگی کے باوجود زبان نمو پاتی رہتی ہے، ماہرین کا کہنا ہے کہ زبان کاٹنے کے بعد یہ کیڑا زبان کی جڑ سے لہو چوس کر زندہ رہتا ہے۔
ماہرین کے مطابق اگر اس پیراسائٹ کو اس دوران کوئی مادہ مل جائے تو یہ اپنی نسل بھی بڑھانے لگتا ہے۔ یہ زبان خور کیڑا ایکواڈور سے لے کر کیلیفورنیا تک عام پایا جاتا ہے اور بالخصوص اوقیانوس میں بھی ملتا ہے، اسے انسانوں کے لیے بے ضرر سمجھا جاتا ہے۔
