سڈنی: ریسلنگ کی دنیا کے معروف کھلاڑی جان سینا کرکٹ کی دنیا میں داخل ہوگئے اور انہوں نے بلا اٹھا لیا، ریسلر نے نہ صرف دنیا کے تیز ترین باؤلر سے ٹریننگ لی بلکہ کرکٹ کے جوہر بھی دکھائے۔
تفصیلات کے مطابق دیگر کھیلوں کے کھلاڑیوں کا کرکٹ میں کھیل بڑھتا جارہا ہے یہی وجہ ہے کہ اب ریسلنگ کی دنیا کے بڑے نام جان سینا نے بھی کرکٹ کی دنیا میں انٹری دے دی۔
جان سینا کی آسٹریلوی کھلاڑی شین واٹسن کے ساتھ کرکٹ کھیلنے کی ویڈیو نے دھوم مچادی، معروف ریسلر نے آسٹریلوی ڈومیسٹک لیگ بگ بیش لیگ کے دوران بلا اٹھایا تاہم وہ اچھی کارکردگی نہ دکھا سکے۔
اس موقع پر واٹسن نے مزاحیہ انداز میں کہا کہ وہ مخالف ٹیم پر رعب ڈالنے کے لیے جان سینا کو اپنی ٹیم میں کھلانا پسند کریں گے۔
ریسلنگ کا 16 بار اعزاز اپنے نام کرنے والے جان سینا نے سڈنی اسکول کا دورہ کیا اور بچوں سے ملاقاتیں بھی کیں، اس موقع پر ہالی ووڈ اسٹارز بھی موجود تھے۔
